Abaı oblysynda aıý maldy qyryp jatyr – feık
SEMEI. KAZINFORM – Abaı oblysyndaǵy «Tarbaǵataı» memlekettik ulttyq tabıǵı parkindegi aıý Úrjar aýylyndaǵy aýyl halqynyń malyn qyryp jatqany jaıly jalǵan aqparat taraýda.
Búgin áleýmettik jelide «Tarbaǵataı» memlekettik ulttyq tabıǵı parkindegi aıýdyń sol mańdaǵy Úrjar aýdanyndaǵy aýyldardyń halqyna maza bermeı, maldy qyryp jatqandyǵy týraly jazba jarııalanǵan. Vıdeoda birneshe atty adamnyń sıyrǵa shapqan aıýdy qýyp júrgendigin kórýge bolady.
«Bul Abaı oblysy Úrjar aýdanyna qarasty aýyl halqynyń janaıqaıy. Qyrylyp jatqan maldyń ótemi qalaı bolady? Osy taýǵa ulttyq parktiń qajeti bar ma? Halyq malyn baǵýǵa jer tappaı otyr», - dep jazady jarııalanym avtory.
Anyq-qanyǵyn bilý úshin Kazinform tilshisi «Tarbaǵataı» memlekettik ulttyq tabıǵı parki» RMM dırektory Aıdyn Serkebaevqa habarlasyp kórdi.
«Bul jalǵan aqparat. Vıdeodaǵy oqıǵa bizde bolmaǵan. Qytaıdaǵy jaǵdaı. Ol vıdeodaǵy taýda qylqan japyraqty ósimdikter ósip tur. Al bizdiń ulttyq parktegi taýlarda ondaı aǵash múlde joq. Sondyqtan jurtty jalǵan aqparatqa senbeýge, ony taratpaýǵa shaqyramyn», - dep túsindirdi ol.
