Abaı oblysynyń úsh birdeı aýylynda súzgiden ótpegen aýyz sý berilip kelgen
ASTANA. KAZINFORM — Maqanshy aýdanynyń prokýratýrasy halyqty aýyz sýmen qamtamasyz etý kezinde zańnama talaptarynyń saqtalýyna tekserý júrgizdi. Tekserý barysynda turǵyndardy qaýipsiz aýyz sýmen qamtamasyz etýge qaýip tóndiretin birqatar buzýshylyqtar anyqtaldy. Bul týraly óńirdegi prokýratýra málim etti.
Atap aıtqanda, Buǵybaı, Qyzylbulaq jáne Qyzyljuldyz aýyldaryndaǵy blok-modýldik stantsııalarda sý súzý júıeleriniń joqtyǵy anyqtaldy. Sonymen qatar atalǵan nysandarda sanıtarııalyq-qorǵaý aımaqtary belgilenbegen jáne qajetti sanıtarııalyq qorytyndylar alynbaǵan.
Sondaı-aq Beket jáne Qabanbaı aýyldarynda bıýdjet qarajaty esebinen salynǵan, jalpy quny 2 mlrd teńgeden asatyn sýmen jabdyqtaý jelileri qurylys aıaqtalǵannan keıin kommýnaldyq kásiporynnyń balansyna berilmegeni anyqtaldy. Sonyń saldarynan atalǵan nysandar is júzinde tıisti qyzmet kórsetýsiz qalǵan.
Anyqtalǵan buzýshylyqtar halyqqa belgilengen sanıtarııalyq talaptarǵa sáıkes kelmeıtin aýyz sýdyń berilýine ákep soǵýy múmkin edi.
Tekserý nátıjeleri boıynsha aýdan prokýratýrasy anyqtalǵan buzýshylyqtardy joıý jáne sýmen jabdyqtaý nysandaryn tıisinshe kútip-ustaýdy qamtamasyz etý týraly aýdan ákimdigine usynys engizdi.
Qazirgi ýaqytta jergilikti atqarýshy organdar buzýshylyqtardy joıý boıynsha tıisti sharalar qabyldanyp jatyr.
Aýdan prokýratýrasy olardyń is júzinde joıylýyna baqylaý júrgizip jatyr.
