Abaı oblysynda aýyl sharýashylyǵy eńbekkerlerine qurmet kórsetildi
SEMEI. KAZINFORM - Aýyl sharýashylyǵy jáne qaıta óńdeý ónerkásibi qyzmetkerleriniń kúni Abaı oblysynda keń kólemde atalyp ótti. Semeıdegi Abaı atyndaǵy kitaphanada uıymdastyrylǵan «Altyn kúz» saltanatty sharasy aıasynda óńirdiń agrarlyq salasynda eńbek etip júrgen úzdik mamandar marapattaldy.
Aýyl sharýashylyǵy eńbekkerleriniń merekesinde quttyqtaý sóz sóılegen oblys ákimi Berik Ýálı aımaqtyń aýyl sharýashylyǵy salasynda atqarylyp jatqan jumystarǵa, agrosalanyń aldaǵy baǵyt-baǵdaryna toqtalǵan edi.
- Qasym-Jomart Toqaev aýyl sharýashylyǵy eńbekkerleriniń forýmynda sóılegen sózinde «Jalpy memleket pen bıznes aýyldaǵy barlyq máseleni birlesip sheshýi kerek. Agroónerkásippen aınalysý úshin aýylǵa kelgen jas kásipkerlerdi baǵalaımyn. Memleket te sizderdiń eńbekterińizdi umyt qaldyrmaıdy. Jaýapkershiligi mol kásipkerler men ınvestorlar ǵana eldegi oń ózgeristerdiń naǵyz kóshbasshysy bola alady» dep aıryqsha atap ótken bolatyn.
Abaı oblysynyń aýyl sharýashylyǵy salasy turaqty damyp keledi. Osy jyldyń 10 aıynda aýyl sharýashylyǵynyń jalpy ónim kólemi 404,3 mlrd teńgeni qurap, naqty kólem ındeksi 100,8 paıyzǵa jetti. Mal sharýashylyǵynda 105,2 paıyz ósim bolsa, qaıta óńdeý salasynda jańa zaýyttar iske qosylyp, tehnıka parki jańartylýda. Bul baǵytta 15 mlrd teńgeden astam sýbsıdııa jáne jeńildetilgen nesıeler berildi, 446 jańa aýyl sharýashylyǵy tehnıkasy alynyp, eńbek ónimdiligin arttyrýǵa múmkindik jasaldy.
Bul jetistikter – Memleket basshysynyń, Úkimettiń qoldaýy jáne Sizderdiń mańdaı terińizdiń, qajyrly eńbekterińizdiń nátıjesi. Aýyl eńbekkerleriniń kúndelikti eńbegi oblys turǵyndaryn sapaly azyq-túlik ónimderimen qamtamasyz etip qana qoımaı, óńir ekonomıkasynyń damýyna eleýli úles qosýda. Sizderge shyn júrekten alǵysymdy bildire otyryp, eńbekterińizge mol tabys, zor densaýlyq, otbasylaryńyzǵa amandyq pen baq-bereke tileımin, – dedi aımaq basshysy.
Memlekettik qoldaý sharalarynyń arqasynda 10 aıda 112,5 myń tonna et (5,2% ósim) jáne 275,2 myń tonna sút (6,2% ósim) óndirildi. Bıyl óńirde 349 myń tonna astyq, 258 myń tonna kartop pen kókónis, 502,9 myń tonna maıly daqyldar jınaldy. Oblystyń aýyl sharýashylyǵy salasyna jyl basynan beri 45,9 mlrd teńge ınvestıtsııa tartylyp, jalpy quny 12,8 mlrd teńge bolatyn 8 ınvestıtsııalyq joba iske qosyldy.
Merekelik shara barysynda aýyl sharýashylyǵynda eńbegimen erekshelengen jandarǵa memlekettik jáne salalyq marapattar tapsyryldy. «Aı-Ar» JShS basshysy Erbol Qabdrahmanov, «Prıırtysh broıler qus fabrıkasy» JShS dırektory Baltabek Naýryzbaev «Qurmet» ordenimen marapattaldy. «Araı East Food» JShS bas tehnology Lıýdmıla Balashova, «Kókjyra» óndiristik kooperatıviniń tóraǵasy Nurlan Marqabaev (Aqsýat aýdany), «Jasmın» sharýa qojalyǵynyń basshysy Evgenıı Jbratov (Borodýlıha aýdany), «BA AgroGroup» JShS mehanızatory Muhamedhan Asanbekov (Besqaraǵaı aýdany), «Sadý» sharýa qojalyǵynyń basshysy Serik Myrzabekov (Jańasemeı aýdany) III dárejeli «Eńbek Dańqy» ordenin aldy. Eńbek adamdary men sala úzdikterine «Eren eńbegi úshin», «Eńbek ardageri» medaldary, «Aýyl sharýashylyǵy salasynyń úzdigi», «Abaı oblysyna sińirgen eńbegi úshin» tósbelgileri, Qazaqstan Respýblıkasy Premer-mınıstri men oblys ákiminiń Alǵys hattary, Qurmet gramotalary berildi.
Erekshe atap óterligi, bıyl alǵash ret aýyl sharýashylyǵy salasynyń ozattaryna 10 avtokóliktiń kilti syıǵa tartyldy. Olar «Úzdik shopan», «Úzdik zootehnık», «Úzdik mehanızator», «Úzdik kombaınshy», «Úzdik baqtashy», «Úzdik agronom», «Úzdik dıqanshy», «Úzdik jas maman», «Úzdik tehnolog», «Úzdik traktorshy» sııaqty nomınatsııalar boıynsha anyqtaldy.
Oblys ákimi saltanatty shara aıasynda uıymdastyrylǵan kórmeni tamashalap, óńirdiń iri jáne shaǵyn kásiporyndary usynǵan ónimdermen tanysty.
