Abaı oblysynda aýa raıy qolaısyzdyǵyna baılanysty 60-qa jýyq adam jolda qaldy

SEMEI. KAZINFORM — Abaı oblysynda jolda qalǵan 60-qa jýyq adam jylytý beketine jetkizildi.

Oblystyq polıtsııa departamenti baspasóz qyzmetiniń málimetine súıensek, Shar qalasynyń temirjol stantsııasyna Qyzylorda-Semeı baǵytyndaǵy poıyzben kelgen jolaýshylar ary qaraı jumys babymen Shyǵys Qazaqstan oblysyna jol tartýy tıis bolǵan.

Alaıda qolaısyz aýa raıyna baılanysty respýblıkalyq mańyzy bar «Omby-Maıqapshaǵaı» tasjoly jabylyp, jumys berýshi mekemeniń avtokólikteri Semeı qalasynan shyǵa almaı qalǵan.

— Qıyn jaǵdaıǵa tap bolǵan azamattar shuǵyl túrde «102» arnasyna habarlasyp, kómek surady. Tártip saqshylary kelip jetip, olardy Shar qalasyndaǵy sport keshenindegi jylytý beketine ornalastyrdy. Azamattarǵa qajetti jaǵdaı jasalyp, olardyń ómiri men densaýlyǵyna tóngen qaýiptiń aldyn alý boıynsha tıisti sharalar qabyldandy, — delingen aqparatta.

Eske salsaq, osyǵan deıin SQO-da boranda polıtseıler 600-den astam avtokólikti kolonnamen alyp júrgeni habarlanǵan.