Abaı oblysynda aspaly kópirden qulaǵan 3 adam kóz jumdy

SEMEI. KAZINFORM – Abaı oblysyndaǵy Aıagóz aýdanynda sharýa qojalyǵynyń jumysshylary kópirden qulap, mert boldy.

Oqıǵa 15 sáýirde saǵat 15:50-de Aıagóz aýdany Aqsháýli aýylynda bolǵan.

Kýágerlerdiń aıtýynsha, sharýa qojalyǵynyń úsh jumysshysy Kókqamyr ýchaskesindegi aǵash aspaly kópir arqyly mototsıkldi alyp ótpek bolady. Sol kezde olar túgeldeı Qaraqol ózenine qulap ketken. Jergilikti atqarýshy organdardyń qyzmetkerleri jaǵadan uıaly telefondar men syrt kıimderdi tapty. 

Olarǵa TJD qutqarýshylary kelip qosylyp, izdestirý-qutqarý jumystaryn bastady. Sonyń nátıjesinde 16 sáýir kúni tańerteń 1980 jáne 1978 jylǵy eki er adamnyń máıiti tabyldy. 

— Saǵat 14:35-te qutqarýshylar 1967 jyly týǵan úshinshi er adamnyń denesin tapty. Abaı oblysynyń Polıtsııa departamenti tergeý amaldaryn qolǵa aldy. Sot-medıtsınalyq saraptama taǵaıyndalǵan, - dep habarlady Abaı oblysynyń TJD baspasóz qyzmetinen. 

Eske salsaq, osyǵan deıin Almatyda júk kóligi 7 jasar qyzdy basyp ketkenin jazǵan edik.