Abaı oblysynda asa iri kólemdegi esirtki tasymalyna tosqaýyl qoıyldy
SEMEI. KAZINFORM - Abaı oblysynyń polıtsııa qyzmetkerleri asa iri kólemdegi esirtki zattaryn tasymaldamaq bolǵandardyń jolyn kesti.
«Aıagóz-Shep» statsıonarlyq beketinde polıtseıler Óskemen qalasynyń 32 jastaǵy turǵyny tizgindegen Mitsubishi Pajero markaly avtokóligin tekserý úshin toqtatty. Tekserý kezinde júrgizýshiniń tyıym salynǵan zattardy tasymaldaýy múmkin degen kúdik týyndady.
- Dálelderdi jedel túrde tirkeý jáne tıisti áreketterdi júzege asyrý maqsatynda oqıǵa ornyna kezekshi tergeý-jedel toby shuǵyl túrde jetkizildi. Kólikti tintý barysynda ósimdik tektes, jasyl tústi, ótkir ıisi bar zat salynǵan eki karton qorap tabyldy. Sot-hımııalyq saraptamanyń qorytyndysyna sáıkes, tárkilengen zat jalpy salmaǵy 18 099,47 gramm bolatyn «keptirilgen marıhýana» esirtki zaty bolyp shyqty, - dep habarlady oblystyq polıtsııa departamentinen.
Atalǵan derek boıynsha sotqa deıingi tergeý bastaldy. Kúdikti ýaqytsha ustaý ızolıatoryna qamaldy.
Eske salsaq, osyǵan deıin Abaı oblysynyń polıtseıleri aldanǵan adamdarǵa alaıaqtardyń qaıta habarlasyp jatqanyn eskertkeni habarlanǵan.