Abaı oblysynda alǵash ret áıelder forýmy ótti
Besqaraǵaı aýdanynda aýqymdy áıelder forýmy ótti. Bul Abaı oblysy boıynsha uıymdastyrylǵan osyndaı alǵashqy forým, dep habarlaıdy Kazinform.
Abaı oblysy ákimdiginiń málimetine súıensek, áıelder forýmyna túrli salada qyzmet etip júrgen 100-ge jýyq áıel, onyń ishinde batyr analar, memlekettik qyzmetkerler, úkimettik emes uıymdar men BAQ ókilderi qatysty.
«Búginde elimizdiń qyz-kelinshekteri san alýan salada qyzmet etip, úlken tabystarǵa jetip jatyr. Bul eńbekqorlyq pen iskerliktiń aıqyn kórinisi. Birneshe jyl ishinde Qazaqstannyń saıası jáne áleýmettik-ekonomıkalyq damýyndaǵy áıelderdiń róli turaqty túrde artyp keledi. Sonymen qatar shaǵyn jáne orta bıznesti ilgeriletýde áıelderdiń róli erekshe. Jalpy názik jandylardyń barlyq salada ter tógip kele jatqany kóńil qýantady», - dedi Abaı oblysy Qoǵamdyq damý basqarmasy basshysynyń orynbasary Arman Jemaǵulov.
Qazirgi tańda oblystyń áıelder qaýymy qyzmettiń ár salasyna belsendi túrde atsalysýda. Osyǵan oraı óz mamandyǵynda aıtarlyqtaı nátıjege qol jetkizgen áıelder oblys ákiminiń Alǵys hatymen marapattaldy.
Sonymen qatar forýmǵa qatysýshylar ózin-ózi damytý, kásip ashý, densaýlyqty kútý jáne basqa da mańyzdy trenıngterge qatysty. Shara barysynda Besqaraǵaı aýdanynyń kásipkerleri óz ónimderiniń kórmesin de usyndy.
