Abaı oblysynda alǵash ret «Aıaly áje» forýmy ótti
SEMEI. KAZINFORM - Memleket basshysynyń bastamasymen elimizde keńinen atalyp ótip jatqan Ulystyń uly kúni Naýryzdyń onkúndiginde ákimdiktiń qoldaýymen Abaı oblysy ardagerler keńesi «Ájeler – ult uıytqysy, tárbıe besigi» taqyrybynda «Aıaly áje» forýmyn uıymdastyrdy.
Naýryznamadaǵy búgingi Shańyraq kúninde ótken taǵylymdy forýmdy Muqan Tólebaev atyndaǵy mýzykalyq ýchılışeniń stýdentteri «Abaı joly» romanynyń teatrlandyrylǵan qoıylymymen ashty.
Ultymyzdyń ulyq qasıetterin boıyna sińirgen, asyl ájelerimiz urpaqtar sabaqtastyǵyn jarasymdy jalǵastyryp, otbasy qundylyqtaryn, salt-dástúrdi dáriptep jatyr. Osy maqsatta eren eńbek etip júrgen aǵa býyn ókilderine oblys ákiminiń birinshi orynbasary Shalqar Baıbekov óz rızashylyǵyn jetkizdi.
«Ulystyń uly kúni qarsańynda, ózderińizben «Aıaly áje» forýmynda júzdeskenime qýanyshtymyn. Ata-baba amanatyn adal saqtap, salt-dástúr men ádet-ǵurypty nasıhattaı bilgen asyl ájeniń qoǵam úshin orny erekshe. Uly perzentti «Abaıym» dep erkeletken Zere ájeni bilmeıtinder kemde-kem. Sol sebepti sizderdiń bataly sózderińiz ben qundy aqyl-keńesterińiz bolashaǵymyz úshin asa qymbat. Ultjandy ul men qylyqty qyz ósirýge qosqan úlesterińizdi árqashan joǵary baǵalaımyz. Sabaqtastyq jibin úzbeı, qoǵam ıgiligi jolyndaǵy zor eńbekterińiz úshin erekshe rızashylyǵymdy bildiremin. Jaýlyqtaryńyzdy kir shalmaı, urpaq alǵysyna bólene berińizder», - dedi Shalqar Baıbekov.
Ulttyq qundylyqtardy dáriptep, urpaqtar sabaqtastyǵynyń saqtalýyna súbeli úles qosqan ájeler oblys ákiminiń Alǵys hatarymen marapattaldy.
Qazir Abaı oblysynyń ardagerler keńesi janynan «Ájeler alqasy» qurylyp, ádet-ǵuryptardy jandandyrý, áje tárbıesin jas urpaqqa sińirý, ana men balany qorǵaý baǵytynda jumys atqaryp jatyr.
Búgingi oblysaralyq forým respýblıkamyzdyń barlyq óńirinde uıymdastyrylyp, ár óńirde jalǵasyp jatyr. Ulttyq qundylyqtardy ulyqtaǵan forým jumysyna oblystaǵy qala jáne aýdandardan 500 jýyq adam qatysty. Taǵylymy men tárbıesi mol keleli keńes Ámire Qashaýbaev atyndaǵy memlekettik fılarmonııasynyń, «Ahaý Semeı» jáne «Aısha bıbi» halyqtyq folklorly ansambliniń kontserttik baǵdarlamasymen qorytyndylandy.
