Abaı oblysynda áleýmettik mańyzy bar azyq-túlik baǵasy shekti deńgeıden asyp ketken

SEMEI. KAZINFORM – Aıagóz aýdanynyń prokýratýrasy áleýmettik mańyzy bar azyq-túlik taýarlary baǵalaryna júrgizgen taldaý barysynda 19 túrli taýardyń 6 túri belgilengen shekti baǵadan joǵary satylǵanyn anyqtady.

Sonymen qatar, jergilikti atqarýshy organdar oblys ortalyǵyna naqty jaǵdaıǵa sáıkes kelmeıtin, ıaǵnı baǵalardy tómendetip kórsetken málimetter usynǵan.

Mysaly, kartoptyń shekti baǵasy 275 teńge bolsa, naqty satý baǵasy 415 teńgeni quraǵan (+44%). Osyndaı baǵa ósimderi sábiz, pııaz, qyryqqabat, sút jáne aıran ónimderinde de tirkelgen.

- Zańnamaǵa qaıshy túrde jergilikti atqarýshy organdar tıisti monıtorıng júrgizbegen. Bul derekterdiń burmalanýyna jáne baǵa ósýine baqylaýdyń bolmaýyna ákelgen. Sondaı-aq aýdanda áleýmettik osal toptarǵa arnalǵan dúkender joq ekeni anyqtaldy, - delingen aqparatta.

Prokýratýra aralasqannan keıin baǵa monıtorıngi kúsheıtilip, saýda núktelerimen shekti baǵadan asyrmaý jóninde jumys bastaldy.

Aıagóz qalasyndaǵy eki dúkenmen áleýmettik mańyzy bar taýarlardy tómendetilgen baǵamen satý týraly kelisim jasaldy.

Aıta keteıik, Abaı oblysynda 68 myń tonna qumdy zańsyz qazǵandar anyqtaldy.