Abaı oblysynda alaıaqtar halyqty aldaýdyń jańa ádisine kóshti

SEMEI. KAZINFORM – Abaı oblysynda alaıaqtar turǵyndarǵa ózderin domofonǵa tehnıkalyq qyzmet kórsetetin kompanııanyń qyzmetkerleri retinde tanystyra bastady.  

Eń áýeli olar azamattarǵa qońyraý shalyp, ózderin domofonǵa tehnıkalyq qyzmet kórsetetin kompanııanyń qyzmetkerleri retinde tanystyrady. Odan soń «qosymsha kiltter jasaý» nemese «úıge kiltsiz kirý qyzmetin qosý» sııaqty jalǵan qyzmetterdi usynady.

– Sol úshin podez esigin kiltsiz ashýǵa múmkindik beretin alty tańbaly «jeke kod» jiberetinin aıtady. Ár páterdiń jeke kody bolatynyn jáne bul jańa, resmı qyzmet ekenin alǵa tartady.Alaıda shyn máninde mundaı servıs múldem joq. Azamattyń kelisimin alǵan soń alaıaqtar jeke derekterdi jınaýǵa kirisedi, - dep habarlady Abaı oblystyq Polıtsııa departamentinen.

Sóıtip aldanǵan adamnyń atyna nesıeler rásimdeıdi. Al naǵyz domofon kompanııalary telefon arqyly jeke derekterdi suramaıdy. 

– Kúdik týdyratyn qońyraýlar túsken jaǵdaıda áńgimeni dereý toqtatyp, bul týraly «102» jedel arnasyna habarlasyńyz, - dep eskertti polıtseıler. 

Eske salsaq, osyǵan deıin Almatyda alaıaqtyqtyń 30 deregine qatysy bar kúdikti ustalǵany habarlanǵan.