Abaı oblysynda áli de barlyq úıge jylý berilgen joq

SEMEI. KAZINFORM – Abaı oblysynda ortalyqtandyrylǵan jylý júıesine qosylǵan úılerdiń 90 paıyzyna jylý berildi.

Oblystyq Energetıka jáne turǵyn úı-kommýnaldyq sharýashylyq basqarmasynyń málimetine súıensek, aýa temperatýrasynyń tómendeýine baılanysty Semeıde jylý berý maýsymy 1 qazanda bastaldy. 

«Búginde bilim berý, densaýlyq saqtaý jáne áleýmettik nysandar tolyqtaı jylýǵa qosyldy. Al oblys boıynsha ortalyqtandyrylǵan jylý júıesine qosylǵan túrǵyn úılerdiń 90 paıyzyna jylý berildi. Bıýdjettik uıymdardyń avtonomdy qazandyqtaryn kómirmen qamtamasyz etý jumystary aıaqtaldy. Barlyq qoımalarda kómir qoryn kún saıyn tolyqtyrý jalǵasýda», - delingen aqparatta. 

Óńirdiń temirjol tuıyqtarynda 12,5 myń tonna kómir bar. Atap aıtqanda, Semeıde – 10 myń tonna, Kýrchatovta – 0,5 myń tonna, Aıagóz aýdanynda – 1 myń tonna, Borodýlıha jáne Jarma aýdandarynda – 0,5 myń tonnadan.

«Oblystyń jylý qazandyqtarynda 93 myń tonna kómir bar. Bul jyldyq qajettiliktiń 16 paıyzyn quraıdy. Barlyq jylý kózderi 10 kúndik qosymsha kómir qorymen qamtamasyz etilgen», - delingen habarlamada.

Eske salsaq, osyǵan deıin «Semeı ormanyndaǵy» alapat órtten qaza bolǵan órt sóndirýshiler men ormanshylarǵa eskertkish ashylǵany habarlanǵan.