Abaı oblysynda ákimdikke ótinish jasaǵan 3 myńǵa jýyq adamnyń máselesi sheshildi
SEMEI. KAZINFORM – Abaı oblysynda osy jyldyń birinshi toqsanynda ákimdikke ótinish jasaǵan 3 myńǵa jýyq adamnyń máselesi sheshildi. Óńir ákiminiń apparaty azamattardyń ótinishterine turaqty túrde monıtorıng júrgizýde.
Oblys ákimdiginde QR Bas prokýratýrasy quqyqtyq statıstıka jáne arnaıy esepke alý jónindegi komıteti Abaı oblysy boıynsha departamenti jáne jergilikti atqarýshy organ ókilderiniń qatysýymen keńes ótti. Onda azamattardyń ótinishterin qaraý sapasyn arttyrý jaıy talqylandy.
«Jıynda QR Bas prokýratýrasy quqyqtyq statıstıka jáne arnaıy esepke alý jónindegi komıtetiniń oblys boıynsha departamentiniń basshysy Baqytjan Myrzabaev, departamenttiń ótinishterdi taldaý jáne baqylaý bóliminiń basshysy Aıbek Muratuly, ákim apparatynyń ótinishterdi qaraýdy baqylaý bólimi basshysynyń ýaqytsha mindetin atqarýshy Erkejan Qusaıynova baıandama jasady. Osy jyldyń birinshi toqsanyndaǵy málimetterge súıensek, oblystyń jergilikti atqarýshy organdary 8 439 ótinishti tirkep, onyń 5 315-i qaraldy», - dep habarlady Abaı oblysy ákimdiginen.
Onyń ishinde ákimshilik tártipte 2 765 másele sheshildi. Al ońaılatylǵan tártipte – 2 551 ótinishke usynystar men jaýaptar berildi. Ótinishterdiń eń kóbi turǵyn úı-kommýnaldyq sharýashylyq (17,2%), bilim berý (16,5%) jáne aýyl sharýashylyǵy (11,4%) salalaryna qatysty boldy.
«Búginde «e-Ótinish» portaly arqyly 6 138 ótinishke taldaý jasalyp, onyń 300-ine túsinikteme jaýap berildi. Ákim apparatynyń jumys josparyna azamattar men zańdy tulǵalardyń ótinishterimen jumys isteý, olardyń mindetteri men oryndalý merzimderin talqylaýǵa qatysty qala men aýdan ákimdikteriniń, oblystyq basqarmalardyń qyzmetkerlerimen toqsan saıynǵy keńester, semınarlar uıymdastyrý engizilgen», - delingen aqparatta.
