Abaı oblysynda «Abaı kúni» merekesi bastaldy
SEMEI. KAZINFORM - Abaıdyń 180 jyldyǵyna arnalǵan onkúndik mereıtoılyq sharalardyń sońǵy kúni aqynnyń týǵan jeri – Abaı aýdanynda ótip jatyr.
Tańerteńnen Qaraýylǵa jınalǵan halyq qarasy qalyń. Qazaqstannyń ár óńirinen ǵana emes, alys-jaqyn shetelden kelgender de bar. Munda 180 aqshańqan kıiz úı tigilgen.
Ortalyq sahnanyń bir shetinde kıiz úıler tursa, ekinshi jaǵynda saýda-sattyq qyzyp jatyr. Ulttyq naqyshtaǵy zergerlik buıymdar, kıim-keshek, turmystyq zattar men Abaıdyń músinsheleri satýǵa qoıylǵan.
Saltanatty sharaǵa Qazaqstan Respýblıkasy Parlamenti Senatynyń tóraǵasy Máýlen Áshimbaev, oblys ákimi Berik Ýálı, Bas múftı Naýryzbaı qajy Taǵanuly, Senat depýtattary, memleket jáne qoǵam qaıratkerleri, aqyn-jazýshylar jáne mádenıet salasynyń ókilderi kelgen.
Dál qazir ortalyq sahnada Abaıǵa qatysty teatrlandyrylǵan qoıylym qoıylyp jatyr.
Aıta keterligi, tazalyqqa erekshe mán berilip, ájethanalar da ornatylǵan.
Keshke mereıtoıǵa arnalǵan sporttyq saıystardyń jeńimpazdaryn marapattaý rásimi men «Jelsiz túnde jaryq aı» gala-kontserti bolyp, tanymal ánshiler óner kórsetedi.
Eske salsaq, osyǵan deıin Semeıde uly aqynnyń 180 jyldyq mereıtoıyna oraı «Adamzattyń Abaıy» atty respýblıkalyq aqyndar aıtysy men «Jeti qazyna» respýblıkalyq festıvali ótkeni habarlandy. Aıtysqa eldiń ár óńirinen kelgen 12 aıtysker aqyn qatysty. Aıtys júrgizýshisi – belgili aıtysker aqyn, QR Parlamenti Májilisiniń depýtaty Amanjol Áltaev.