Abaı oblysynda «Abaı kúni» qalaı ótip jatyr - fotoreportaj
SEMEI. KAZINFORM - Abaıdyń 180 jyldyǵyna arnalǵan onkúndik mereıtoılyq sharalardyń sońǵy kúni dál qazir aqynnyń týǵan jeri – Abaı aýdanynda ótip jatyr. Sol toıdyń keı sátterin Kazinform tilshisi nazarlaryńyzǵa usynady.
Abaı kúninde abaılyqtar azannan erte turyp, Qaraýylǵa qaraı bet túzedi. Tek óńir halqy emes, Qazaqstannyń túgel derlik oblysy men shetelden de qonaqtar kelgen.
Jınalǵan jurtqa arnalyp aqshańqan kıiz úıler tigilgen. Ár kıiz úıdi qala, aýdan ákimdikteri, basqarmalar, departamentter men túrli uıymdar turǵyzǵan. Abaı mereıtoıyndaǵy kıiz úı sany da tup-týra 180-ge jetedi.
Kıiz úıler ishinde dastarhan jaıylǵan. Biraq "qazir toı qýalaıtyn emes, oı qýalaıtyn zaman" dep Prezıdent aıtqandaı, asta-tók qylyp emes, tek birneshe taǵam túrleri qoıylǵan.
Syrtta halyqqa qol jýǵysh ta qoıylypty. Sabyn men oramal da tur.
Tazalyqqa erekshe mán berilipti. Qoqys jáshikteri tolyp qalmasyn dep jumysshylar lezde tazalap qoıyp jatyr.
Al basqa bir jaqta saýda-sattyqtyń kórkin keltirgender kóp.
Jurt nazaryna Abaıdyń kitaptary, hakim aty jazylǵan kádesyılar, ydystar, ulttyq oıýmen órnektelgen kıim-keshek, taqııa, dombyra, qamshy jáne basqa da túrli taýarlar usynylǵan.
Júrek jalǵaǵysy kelgender káýáp pisirip jatqandardyń qasyna jaqyndaıdy.
Kóliktiń kóptigi sonsha keı júrgizýshiler jerden turaq tappaı temir tulparlaryn taý bókterine qoıyp ketken.
Jınalǵandar úshin ájethanalar salynypty. Patshalar jaıaý baratyn jerde eshqandaı kezek joq.
Jastar men balalar altybaqanǵa otyryp, máz-meıram.
Sahnada Abaıǵa arnalǵan teatrlandyrylǵan qoıylym qoıylyp, ánshiler án men bıden shashý shashty.
Qazir kontsert bitip, el báıge kórýge bet túzegen.
Keshke qaraı "Jelsiz túnde jaryq aı" gala-kontserti bolyp, kómeıine bulbul uıalaǵan tanymal ánshiler óner kórsetpek. Sondyqtan eshkim de úıine qaıtýǵa asyǵar emes.
Eske salsaq, osyǵan deıin Abaı toıynda 10 jasar Alınur saýdany qyzdyryp júrgeni jaıly jazǵanbyz.