Abaı oblysynda 9 stalkerge sot úkimi shyqty
ASTANA. KAZINFORM — Abaı oblysynda jyl basynan beri stalkıng faktileri boıynsha 9 adam sottalǵan. Oblystyq Polıtsııa departamenti qoǵam nazaryn adamnyń jeke shekarasyn buzatyn qaıtalama qońyraýlar, habarlamalar men ańdý sııaqty áreketterdiń qaýiptiligine aýdardy.
— «Men jaı ǵana sóıleskim keldi», «Onyń nazaryn aýdarǵym keldi», «Meniń eshqandaı jaman oıym bolǵan joq» — stalker óz áreketin osylaı aqtaýy múmkin. Biraq adamnyń «joq» degen jaýaby — naqty shekara. Stalkıng — áleýmettik jelide qaıta-qaıta jazý, qońyraý shalý, sońynan ańdý, baqylaý, qajetsiz kezdesýler izdeý arqyly adamnyń jeke keńistigin buzý. Syrt kózge bul «jaı ǵana qyzyǵýshylyq» bolyp kórinýi múmkin. Al jábirlenýshi úshin bul — qorqynysh, mazasyzdyq jáne turaqty psıhologııalyq qysym, — deıdi polıtsııa qyzmetkerleri.
Osy máseleniń aldyn alý jáne qoǵamǵa stalkıngtiń shynaıy qaýiptiligin túsindirý maqsatynda Abaı oblysy Polıtsııa departamentiniń qyzmetkerleri arnaıy beınerolık ázirledi. Sıýjette stalker óz áreketin «zııansyz qarym-qatynas» retinde kórsetýge tyrysady. Alaıda adamnyń qalaýyn elemeý, onyń sońynan qalmaý jáne jeke shekarasyn qaıta-qaıta buzý — qalypty qarym-qatynas emes.
- Stalkıng — nazar aýdarý emes.
- Stalkıng — qamqorlyq emes.
- Stalkıng — mahabbat emes.
- Bul — adamnyń erkindigi men qaýipsizdigine qaýip tóndiretin qýdalaý.
— Abaı oblysynda jyl basynan beri stalkıng boıynsha 9 adamǵa sot úkimi shyqty. Bul — onyń jaı ǵana «mazalaý» emes, naqty quqyqtyq saldary bar áreket ekenin kórsetedi. Bireýdiń «joq» degenin qurmetteý — qalypty qarym-qatynastyń bastaýy, — deıdi tártip saqshylary.
Buǵan deıin Qyzylordada stalkıng jasaǵan 4 adamǵa qatysty úkim shyqqanyn jazdyq.
