Abaı oblysynda 9-synyp oqýshysy sybaılas jemqorlyqqa qarsy oıyn jasap shyǵardy

ASTANA. KAZINFORM – Abaı oblysy Borodýlıha aýdanyndaǵy Jezkent mektep-lıtseıiniń 9-synyp oqýshysy Nuralı Amangeldıev sybaılas jemqorlyqqa qarsy «Satylmaıtyn Alpamys» atty kompıýterlik oıyndy jasap shyǵardy. 

Oqýshylarǵa sybaılas jemqorlyqtyń zııanyn túsindirip, oǵan qarsy turý mádenıetin qalyptastyrý maqsatynda jasalǵan oıyn kvest formatynda ázirlengen. Munda oıynshy ózine jasyryn agent nemese jýrnalıst rólin tańdaı alady.

Sondaı-aq tergeýdi kimge qatysty júrgizetinin de ózi sheshedi: sot, prokýror nemese memlekettik qyzmetshi. Oıyn barysynda ol ártúrli epızodtardan ótip, jemqorlyqqa qarsy áreketterdiń qyr-syryn meńgeredi jáne oıyn sońynda jemqorlyqty áshkereleıdi. 

Qazirgi ýaqytta oıyn mektepte quqyq negizderi sabaǵynda tájirıbe retinde qoldanylyp júr. Avtor bolashaqta bul jobany uıaly telefondarǵa arnalǵan tegin qosymsha retinde úsh tilde usynýdy josparlap otyr. Osy maqsatta Nuralı ótken jyly І respýblıkalyq sybaılas jemqorlyqqa qarsy jobalar baıqaýynda jeńip alǵan 1 000 000 teńge syıaqysyn oıyndy damytýǵa jumsaǵan. Sonymen birge oıynnyń ár kezeńine Abaıdyń qara sózderin qosý arqyly onyń rýhanı mazmunyn baıytýdy josparlap otyr. 

«Oıyn Qazaqstandaǵy naqty oqıǵalarǵa negizindelgen kórkem roman formatynda jasalǵan. Ár epızodta Qylmystyq kodekske túsindirme berilip, oqýshylardyń quqyqtyq saýaty arttyrylady. Al oıyn sońynda kóp upaı jınaǵan oıynshy jeńimpaz atanady», - deıdi Nuralı.

Ol sóz arasynda «Satylmaıtyn Alpamys» oqýshylardyń quqyqtyq saýatyn arttyryp, jemqorlyqqa qarsy minez-qulyqty qalyptastyrýǵa arnalǵan erekshe jobaǵa aınalatynyna senetinin jetkizdi.