Abaı oblysynda 8,3 mln teńge jymqyrǵan sport mektebiniń býhgalteri sottaldy

ASTANA. KAZINFORM- – Abaı oblysynyń Jarma aýdanynda balalar men jasóspirimder sport mektebiniń býhgalteri eki jyl boıy jalaqyny zańsyz artyq eseptep, memleketke 8,3 mln teńge zalal keltirgen, dep habarlaıdy oblystyq prokýratýra.

Túrkistan oblysynda 583 mln teńge jymqyrǵan bilim bólimi qyzmetkerlerine úkim shyqty
Foto: Vıdeodan alynǵan skrın

Sot úkimimen ol 3 jylǵa bas bostandyǵyn shekteý jazasyna kesilip, 5 jyl merzimge belgili bir laýazymdardy atqarý quqyǵynan aıyryldy.

Jarma aýdanynyń prokýratýrasy «Jarma aýdandyq balalar men jasóspirimder sport mektebi» KMK qyzmetkerlerine jalaqyny zańsyz esepteý faktisin anyqtaǵan.

Anyqtalǵandaı, mekeme býhgalteri eki jyl boıy óziniń jáne is júrgizýshiniń banktik shottaryna jalaqyny zańsyz túrde artyq eseptep otyrǵan. Sonyń saldarynan memleketke jalpy somasy 8,3 mln teńge zalal keltirilgen.

Atalǵan fakti boıynsha aýdan prokýratýrasy qylmystyq isti tirkep, sotqa deıingi tergep-tekserý júrgizgen. Tergeý barysynda býhgalter óz kinásin moıyndap, memleketke keltirilgen zalaldy tolyq kólemde ótegen.

Jarma aýdandyq sotynyń úkimimen ol iri mólsherde alaıaqtyq jasaǵany úshin kináli dep tanyldy. Sot oǵan 3 jylǵa bas bostandyǵyn shekteý jáne 5 jyl merzimge belgili bir laýazymdardy atqarý quqyǵynan aıyrý jazasyn taǵaıyndady.

Sot úkimi zańdy kúshine endi.

Abaı oblysynyń prokýratýrasy memleket múddelerin qorǵaý, zańdylyqty qamtamasyz etý jáne bıýdjet qarajatyn zańsyz paıdalaný faktileriniń jolyn kesý baǵytyndaǵy jumysty jalǵastyrýda.

Osyǵan deıin Ulytaý oblysynda bank menedjeri turǵyndardy aldap, aqsha jymqyrǵany týraly jazdyq.