Abaı oblysynda 70-ke jýyq turǵyn úı salynyp jatyr
Oblys boıynsha turǵyn úı kezeginde 19 myńnan astam adam bar. Onyń 2442-si kópbalaly otbasylar sanatynda. Bul týraly Abaı oblysynyń ákimi Nurlan Uranhaev elordadaǵy esep berý brıfınginde aıtty, dep habarlaıdy Kazinform.
«Oblys boıynsha turǵyn úı kezeginde 19 myńnan astam adam bar. Onyń 2442-si kópbalaly otbasylar sanatynda. Bıyl biz jalpy aýdany 480 myń sharshy metr bolatyn, 68 kóppáterli jáne jeke turǵyn úı qurylysyn júrgizip kelemiz. Aldaǵy úsh jylǵa taǵy 148 kópqabatty turǵyn úıdi iske qosý josparlanǵan. Bul 6800 otbasyn baspanamen qamtýǵa múmkindik beredi», - dedi Nurlan Uranhaev Astanadaǵy Ortalyq kommýnıkatsııalar qyzmetinde ótken brıfıngide.
Oblys ákiminiń aıtýynsha, bıyl 23 589 jańa jumys orny ashylǵan. Jyl sońyna deıin bul kórsetkishti 25 myńǵa deıin jetkizý josparlanǵan. Budan bólek, jeke qosalqy sharýashylyqtardy qoldaý jáne damytý úshin 697,4 mln teńgege 110 jeńildetilgen nesıe, jastardyń kásipkerlik bastamalary úshin – 1,1 mlrd teńgege 2,5% ústeme aqymen 214 shaǵyn nesıe berildi.
Sonymen birge, densaýlyq saqtaý salasynda 2025 jylǵa deıin 10,8 mlrd teńgege 65 alǵashqy medıtsınalyq-sanıtarlyq kómek nysandarynyń qurylysy josparlanyp otyr. Qazir jobalyq-smetalyq qujattamany úlgilik jobaǵa bekitý boıynsha jumys júrgizilip jatyr.
«Semeı qalasynda 100,4 mlrd teńgege 5 medıtsınalyq nysan salý kózdelip otyr. Qaraǵaıly aýdanynda jeke ınvestorlar esebinen emhana men Nefrologııa ortalyǵynyń qurylysy bastaldy.Osy jerde taǵy bir mańyzdy máselege kóńil bólgim keledi. Bıyl biz alǵashqy bolyp, Prezıdent tapsyrmasymen múgedektigi bar adamdarǵa arnalǵan 150 oryndyq zamanaýı ońaltý ortalyǵyn ashtyq. Bizge onyń mańyzy erekshe. Sebebi oblysta 24 481 múgedektigi bar adam turady. Onyń 2 905-i – balalar. Budan bólek, taǵy Semeı men Aıagózde 150 oryndyq eki ortalyq salýdy kózdep otyrmyz. Qazir, jobalyq-smetalyq qujattama ázirlenip jatyr», - dedi óńir basshysy», - dedi N.Uranhaev.
