Abaı oblysynda 68 myń tonna qumdy zańsyz qazǵandar anyqtaldy

SEMEI. KAZINFORM — Abaı oblysynda tabıǵı resýrstardy zańsyz ıgerip, paıda tapqan toptyń áreketi áshkerelendi, dep habarlaıdy óńirdegi prokýratýra.

Júrgizilgen jumystardyń nátıjesinde jalǵan sertıfıkattardy paıdalanyp, 68 myń tonnadan astam qumdy zańsyz qazyp, ony saýdalaýmen aınalysqan top anyqtaldy. Jer qoınaýyna keltirilgen zalal eleýli dep tanyldy.

- Qylmystyq áreketti áshkereleýge zamanaýı tsıfrlyq tehnologııalar qoldanylǵan. Dron arqyly áýeden baqylaý júrgizilip, zańsyz qazba jumystarynyń naqty koordınattary anyqtalǵan. Sonymen qatar, «Sergek» avtomattandyrylǵan júıesi arqyly qumnyń bastapqy orny men jetkizilý baǵyty tolyq baqylaýǵa alynǵan, - dep jazdy baqylaýshy organnan.

Qabyldanǵan sharalardyń nátıjesinde zańsyz kásipkerlik áreketke tosqaýyl qoıylyp, kináli tulǵalar Qylmystyq kodekstiń 214-baby 2-bóligi 2-tarmaǵy, 218-baby 1-bóligi, 334-baby 3-bóligi 3-tarmaǵy jáne 386-baby 2-bóligi boıynsha jaýapkershilikke tartyldy.

Sot eki adamdy qylmystyń quraly bolǵan eki tıegishti tárkileı otyryp, bas bostandyǵynan aıyrý jazasyna kesken.

Sondaı-aq memleketke keltirilgen 272 mıllıon teńgeden astam zalal óndirildi. Jalpy quny 144 mıllıon teńge bolatyn múlikke tyıym salynǵan.

Sot úkimi áli zańdy kúshine engen joq.

Aıta keteıik, jer qoınaýyn paıdalanýshylarǵa arnalǵan memlekettik aqparattyq júıe iske qosyldy.