Abaı oblysynda 64,2 myń gektar paıdalanylmaǵan jer memleket menshigine qaıtaryldy
ASTANA. KAZINFORM – Abaı oblysynda aýyl sharýashylyǵy maqsatyndaǵy jerlerdi memleket menshigine qaıtarý boıynsha jospar mejeden asyra oryndaldy. Bul týraly AShM baspasóz qyzmeti habarlady.
2024 jyldyń birinshi jartyjyldyǵynda 64,2 myń gektar paıdalanylmaǵan aýyl sharýashylyǵy jeri qaıtaryldy. Bul kórsetkish bekitilgen jospar — 62,3 myń gektardyń 102%-y.
— 2025 jylǵa qaraı Abaı oblysy boıynsha jalpy kólemi 170 myń gektar jerdi memlekettik menshikke qaıtarý josparlanǵan. Atalǵan jumysty tıimdi júzege asyrý maqsatynda aı saıynǵy keste bekitilip, jer kólemi aýdandar arasynda bólindi. Qol jetkizilgen nátıjeler Aýyl sharýashylyǵy mınıstrligi Jer resýrstaryn basqarý komıtetiniń Abaı oblysy departamenti men aýdan jáne qala ákimdikteriniń tyǵyz ózara is-qımylynyń nátıjesi bolyp otyr. Paıdalanylmaı jatqan jerlerdi qaıtarý jumystary jalǵasyp jatyr, — delingen habarlamada.
Aıta ketelik SQO-da jer ýchaskesin zańsyz bergeni úshin jer komıssııasynyń músheleri jazalanǵan edi.