Abaı oblysynda 64 aýyldy sý basýy múmkin
ÓSKEMEN. KAZINFORM – Abaı oblysyndaǵy 64 eldi mekendi sý basý qaýpi bar. Búginde sol aýyldardyń qaýipsizdigin qamtamasyz etý úshin qandaı jumystar atqarylyp jatyr? Kazinform tilshisi osy saýalǵa jaýap izdep kórdi.
Qaı aýdandarda qaýip basym?
Oblystyq Tótenshe jaǵdaılar departamentiniń málimetinshe, 2026 jylǵy kóktemgi sý tasqyny qaýpi bar kezeńge daıyndyq jumystary josparǵa sáıkes júrgizilip jatyr.
- Óńirde sý basý yqtımaldyǵy bar aýmaqta 64 eldi meken ornalasqan. Bul jerlerde 42 myńnan astam adam turady. Qazirgi ýaqytta 22 eldi mekende qaýip deńgeıi edáýir tómendetilgen. Boljamdy gıdrometeorologııalyq jaǵdaılardy eskere otyryp, eldi mekender men tirshilikti qamtamasyz etý nysandaryn qorǵaýǵa baǵyttalǵan aldyn alý jáne ınjenerlik is-sharalar kesheni iske asyrylyp keledi, - dep jaýap berdi departamenttiń baspasóz qyzmeti agenttik saýalhatyna.
«Qazgıdromet» boljamyna sáıkes, bıylǵy kóktemde Aqsýat, Aıagóz, Besqaraǵaı, Borodýlıha, Jarma jáne Kókpekti aýdandary joǵary táýekel aımaǵynda tur.
- Injenerlik jumystar jospary aıasynda 28 shara oryndaldy. Sonymen qatar jospardan tys 33 shaqyrym qorǵanys bógetterine jóndeý jumystary júrgizilip, eldi mekenderdiń aınalasynda 8 shaqyrym qorǵanys úıindileri turǵyzyldy. Shamamen 14 shaqyrym aryq jelisi tazartylyp, avtokólik joldaryna jáne temirjoldardyń astyna 25 qosymsha sý ótkizý qurylystary ornatyldy. Ózen arnalarynyń qaýipti ýchaskelerinde uzyndyǵy 21 shaqyrym jaǵalaýdy bekitý jumystary atqarylyp, 8 shaqyrym arnada túbin tereńdetý jumystary júrgizildi, - delingen aqparatta.
Ertis jáne Úbi ózenderinde profılaktıkalyq jarý jumystaryn júrgizý úshin ýchaskeler aıqyndaldy. Gıdrologııalyq ahýal men gıdrotehnıkalyq qurylystardyń jaı-kúıine turaqty monıtorıng júrgizilip jatyr.
20 aqpanda Ertis jáne Úbi ózenderine tikushaqpen aerovızýaldy monıtorıng jasaldy. Nátıjesinde ózenderdiń tolyqtaı muz jamylǵany, jaǵalaý aýmaqtarynda sý basý jáne muz betine sýdyń shyǵý faktileri tirkelmegeni anyqtaldy.
Komandalyq-shtabtyq oqý-jattyǵý ótedi
Abaı oblysy ákimdiginiń habarlaýynsha, óńirde sý tasqynyna daıyndyq maqsatynda qajetti materıaldyq-tehnıkalyq qor qalyptastyryldy. Atap aıtqanda, 12 myń tonna ınertti materıal, 112 tonna janar-jaǵarmaı materıaldary jáne 45 myń dana ydys-qap daıyndaldy. Jedel áreket etý úshin 1 400-den astam adam, 550-den astam tehnıka, 30 júzý quraly jáne 170 sý aıdaý qurylǵysynan turatyn kúshter men quraldar toby jasaqtaldy. «Qazavıaqutqarý» AQ-nyń Mı-8 tikushaǵy turaqty daıyndyqta.
- Oblystyń sý tasqyny kezeńinen qaýipsiz ótýin qamtamasyz etýge baǵyttalǵan aldyn alý sharalary tolyq kólemde jalǵasatyn bolady. Jaǵdaı baqylaýda, - dep habarlady ákimdikten.
Aıta keteıik, óńirde azamattyq qorǵaý qyzmetteriniń daıyndyǵyn pysyqtaý maqsatynda 27-28 aqpan kúnderi «Kóktem-2026» respýblıkalyq komandalyq-shtabtyq oqý-jattyǵýy ótkizilmek.
Eske salsaq, osyǵan deıin Shyǵys Qazaqstanda sý tasqynyna daıyndyq jumystarynyń qalaı júrgizilip jatqany jaıly jazǵanbyz.