Abaı oblysynda 62 000-nan asa azamat jeke basty kýálandyratyn qujat aldy

ASTANA. KAZINFORM — Onyń ishinde 42 743-i — jeke kýálik, al 19 595-i — pasport, dep habarlaıdy Abaı oblysy Polıtsııa departamentiniń baspasóz qyzmeti.

Vedomstvo málimetinshe, mıgratsııalyq qyzmet Qazaqstan Respýblıkasynyń árbir azamaty qajetti qujattardy ońaı ári ýaqtyly alýyna erekshe kóńil bóledi. Bul qujattar — jeke basyńyzdy rastaıtyn jáne memlekettik organdarmen ózara árekettesýge múmkindik beretin mańyzdy qural.

— Qazaqstan Respýblıkasynyń «Jeke basty kýálandyratyn qujattar týraly» Zańyna sáıkes, árbir azamat jáne turaqty tirkeýde turǵan adam ózimen birge tıisti qujatty alyp júrýge mindetti. Bul — jeke bas pen azamattyqty resmı túrde rastaý úshin qajet jáne «Azamattyq týraly» Zańnyń 4-babynda kózdelgen. Mundaı qujattar quqyqtyq qatynastardy retteýde mańyzdy ról atqarady jáne azamattarǵa senimdilik pen qorǵanys sezimin beredi, — dep túsindirdi Abaı oblysy PD.

Bıyl Abaı oblysynda 15 Halyqqa qyzmet kórsetý ortalyǵynda 62 000-nan astam azamatqa qujattary berildi.

— Onyń ishinde 42 743-i — jeke kýálik, al 19 595-i — pasport. Aıta ketý kerek, jeke basyn kýálandyratyn qujatsyz nemese jaramsyz qujatpen júrý — ákimshilik jaýapkershilikke ákep soǵýy múmkin. Sondyqtan qujattardy ýaqtyly rásimdeý — azamat retinde óz quqyqtaryńyzdy erkin paıdalanyp, mindetterińizdi oryndaýǵa múmkindik beredi, — delingen habarlamada.

Mıgratsııalyq qyzmet zańnamanyń oryndalýyn qatań baqylap, kórsetiletin qyzmetterdiń sapasyn arttyrý baǵytynda turaqty jumys júrgizip keledi.

Budan buryn Ulttyq statıstıka bıýrosy usynǵan aqparatqa sáıkes elimizde Qazaqstan esimdi 28 azamat turatynyn jazǵan edik.