Abaı oblysynda 60 myńǵa jýyq kóshet otyrǵyzyldy
SEMEI. KAZINFORM - Oblys turǵyndary «Taza Qazaqstan» respýblıkalyq aktsııasy aıasynda Besqaraǵaı aýdanynyń Jylandy aýylynyń mańynda kóshet otyrǵyzdy. 12 gektar jerge 57 120 túp kóshet egildi.
Aktsııaǵa qaraǵaıly ormandy qalpyna keltirýge úles qosqysy keletin jerlesterimiz qatysty. Olardyń arasynda jastar, máslıhat depýtattary, eriktiler, BAQ ókilderi men sportshylar bar.
Aktsııaǵa kezekti márte qatysqan oblys ákimi Nurlan Uranhaev bul bastamanyń basty maqsaty óńirdiń bıoalýantúrliligi men ekojúıesin qorǵaýda sheshýshi ról atqaratyn ormandy saqtaý ekenin atap ótti.
«Bul aktsııa bir rettik is-shara emes. Aldaǵy ýaqytta da jalǵasady. Semeı qalasynda «Elimaı» FK, klýb tárbıelenýshileri, «Semeı» fýtzal komandasynyń oıynshylary kóshet otyrǵyzyp, aktsııaǵa óz úlesin qosyp jatyr. Tazalyq jumystaryna bárimiz bir kisideı atsalysyp, aımaǵymyzdy kórkeıtý arqyly óskeleń urpaqqa úlgi bola alamyz», - dedi oblys ákimi óz sózinde.
Bıyl rezervat aýmaǵyndaǵy 6100 gektar jerge 28 mln 700 myń kóshet otyrǵyzý josparlanǵan. Bul jumys eki kezeńdi qamtıdy. Máselen, kóktemde 5 myń gektardan astam, al qalǵan 961 gektarǵa kúzde qaraǵaıdyń jas óskinderin jersindirý mindeti tur.
Aıta keteıik, aktsııa bastalǵannan beri oblysta 12 myńǵa jýyq aýla retke keltirildi. Turmystyq qatty qaldyqtar polıgonyna 13 myń tonnadan astam qaldyq shyǵaryldy. 80 myń aǵash, 22 myń buta otyrǵyzylyp, 218 saıabaq pen 85 tarıhı-mádenı eskertkish abattandyryldy.
