Abaı oblysynda 51 keli esirtki zańsyz aınalymnan alyndy
ASTANA. KAZINFORM — Abaı oblysynda aǵymdaǵy jyldyń basynan beri óńir aýmaǵynda esirtkimen baılanysty 28 qylmys anyqtalyp, barlyq derek boıynsha qajetti protsessýaldyq sharalar qabyldanyp jatyr, dep habarlaıdy oblystyq Polıtsııa departamentiniń baspasóz qyzmeti.
Sonymen qatar, 29 qylmystyq quqyqbuzýshylyq tirkelip, olardyń avtorlaryn anyqtaý jáne jaýapqa tartý baǵytynda belsendi jumys júrgizilýde. Zańsyz aınalymnan 51 kılogramm ártúrli esirtki jáne psıhotroptyq zattar alyndy.
— Esirtki jetkizý arnalarynyń anyqtalýy men joıylýyna erekshe mán berilip otyr. Jedel-izdestirý sharalary nátıjesinde sıntetıkalyq esirtki jetkizýdiń eki turaqty arnasy tolyqtaı jabylyp, bul óńirdegi uıymdasqan qylmystyq topqa eleýli soqqy boldy. Esirtki qylmysyn jasaǵan 10 adam ustalyp, barlyǵy qylmystyq jaýapkershilikke tartylady, sonyń ishinde sıntetıkalyq esirtki zańsyz saqtaǵan eki azamat bar, — delingen habarlamada.
Sıntetıkalyq esirtkiniń taralýy búgingi tańda ózekti máselelerdiń biri bolyp otyr. Qazirgi kezde narkobıznes ınternet-platformalar men baılanyssyz saýda tásilderin belsendi qoldanýda, bul quqyq qorǵaý organdarynan joǵary dárejedegi saqtyqty talap etedi.
Abaı oblysy Polıtsııa departamenti profılaktıkalyq jumysqa erekshe mán beredi. Bilim berý uıymdarynda dárister, derekti fılmder kórsetilimderi ótkizilip, aktsııalar, fleshmobtar jáne sporttyq is-sharalar uıymdastyrylyp jatyr. «Biz ómirdi tańdaımyz — biz esirtkige qarsy» degen uranmen jastardy zańsyz tabys kózderine tartýdyń aldyn alý basty basymdyqtardyń biri bolyp otyr.
Departament jumysynyń negizgi baǵyttarynyń biri — esirtkiden azat, qaýipsiz ortany qalyptastyrý. Bul baǵytta árbir óńir turǵyny zańsyz esirtki aınalymynyń qaýip-qaterinen qoryqpaı, erkin ómir súrip, damýyna jaǵdaı jasalady.
Osydan buryn Qyzylorda oblysynda esirtki qylmysy boıynsha 60 esepshot buǵattalǵanyn jazdyq.