Abaı oblysynda 5 myń túp aǵash kósheti otyrǵyzyldy
SEMEI. KAZINFORM — Memleket basshysy Qasym-Jomart Toqaevtyń bastamasymen qolǵa alynǵan «Taza Qazaqstan» ekologııalyq baǵdarlamasy aıasyndaǵy jalpy ulttyq aktsııaǵa Abaı oblysynyń turǵyndary da belsendi qatysty.
Abaı oblysy ákimdiginiń málimetinshe, óńirdiń 10 aýdany men 2 qalasynda 15 myńǵa jýyq adam tazalyq sharasyna atsalysty. Nátıjesinde 300 gektar aýmaqta 1000 tonna qoqys jınalyp, 5 myń túp aǵash kóshetteri egildi.
Semeı qalasynda jalpyqalalyq aýqymdy senbilik ótti. Ekologııalyq aktsııa barysynda oblys ortalyǵynda 1000 túp aǵash otyrǵyzyldy.
Áýeli Qaraǵaıly yqsham aýdanynda salynyp jatqan jańa saıabaqta qaraǵaı kóshetteri egildi. Іs-sharaǵa oblys ákimi Berik Ýálı qatysty.
Sondaı-aq áýejaıǵa baratyn jol boıynda da kógaldandyrý jumystary júrgizildi. Munda 300 túp jasyl jelek egildi. Aǵash otyrǵyzý sharasyna Semeı qalasy ákimdigi men memlekettik mekemelerdiń 100-ge jýyq qyzmetkeri atsalysty.
«Taza Qazaqstan» ekologııalyq baǵdarlamasy aıasynda óńirde júıeli jumystar atqarylyp keledi. Abaı oblysynda 44 is-sharadan turatyn óńirlik jospar bekitilgen.
Bıylǵy sanıtarlyq-ekologııalyq eki aılyqqa 227 myńnan astam turǵyn, 10 275 uıym jáne 4114 tehnıka tartyldy. 39,3 myń tonna turmystyq qaldyq shyǵaryldy. 27 qyrkúıekte oblystyń barlyq eldi mekeninde ekologııalyq senbilik ótkizildi. Sharaǵa 10 myń turǵyn, 500-ge jýyq uıym qatysty. Nátıjesinde 1050 tonna turmystyq qaldyq polıgondarǵa jetkizildi.
Abaı oblysynda 2022-2024 jyldary 213 myńnan astam aǵash otyrǵyzyldy. Jyl basynan beri óńirde 57 myńnan astam jasyl jelek egildi. Baǵdarlama sheńberinde ekologııalyq mádenıetti qalyptastyrý men tabıǵatty qorǵaý baǵytyndaǵy jumystar júıeli ári turaqty túrde jalǵasyp jatyr.