Abaı oblysynda 470-ge jýyq adam ınternette alaıaqqa aldanǵan
SEMEI. KAZINFORM – Abaı oblysynda osy jyldyń alty aıynda 468 ınternet-alaıaqtyq deregi tirkeldi.
Bul týraly búgin Óńirlik kommýnıkatsııalar qyzmetinde ótken brıfıngte Abaı oblysy Polıtsııa departamenti Kıberqylmysqa qarsy is-qımyl basqarmasy bastyǵynyń orynbasary Mırat Qabytaev málim etti.
- Onyń ishinde 369 is Semeı qalasynda tirkelgen. Qazirgi ýaqytta 100-den astam qylmys ashyldy. Alaıaqtar kóbine áleýmettik jeliler, jalǵan ınvestıtsııalyq jobalar, onlaın-nesıeler, bank kartalaryn «qorǵaý» jáne lotereıalar ótkizý arqyly áreket etedi. Sondaı-aq olar ózderin bank nemese quqyq qorǵaý organdarynyń qyzmetkerleri retinde tanystyrady, - dedi ol.
Polıtseıler azamattardy qońyraý shalǵan belgisiz adamdarǵa senbeýge, kúmándi siltemelerge ótpeýge jáne jeke derekterin eshkimge bermeýge shaqyrady.
Eger qandaı da bir kúmán týyndaǵan jaǵdaıda dereý «102» arnasyna qońyraý shalyńyz.
Eske salsaq, osyǵan deıin Aqtóbede alaıaqtyq deregine qatysy bar kúdikti ustalǵany habarlanǵan.
