Abaı oblysynda 4 myńǵa jýyq júrgizýshi jol erejesin buzǵan
ASTANA. KAZINFORM — Abaı oblysynda ótken «Qaýipsiz jol» jedel-profılaktıkalyq is-sharasy aıasynda barlyǵy 3993 quqyqbuzýshylyq tirkeldi, dep habarlaıdy oblystyq PD baspasóz qyzmeti.
Vedomstvo málim etkendeı, bul tek hattama toltyrý nemese aıyppul salý úshin emes. Bul — árkimniń «Jolda meniń de jaýapkershiligim bar» degen túsinikti sanasyna sińirý úshin uıymdastyrylǵan shara.
Shara aıasynda mynadaı zań buzýshylyqtar anyqtaldy:
- Mindetti saqtandyrýsyz júrgender — 286 júrgizýshi. Qaýipsizdik — tek óziń úshin emes, joldaǵy ár adam úshin mindet.
- Zańsyz jolaýshy tasymaldaǵandar — 14 derek. Jolda tabys tabamyn dep, bireýdiń taǵdyryn qaterge tikkender.
- Telefonmen sóılesip kólik basqarǵandar — 244. Bir qońyraý — bir apattyń bastaýy bolýy múmkin ekenin umytyp ketkender.
- Beldik taqpaǵan, júk pen jolaýshyny durys ornalastyrmaǵandar — 834 jaǵdaı. Bul — «ne bolady deısiń» degen nemquraılyqtyń saldary.
- Manevr jasaý erejesin buzǵandar — 304. Árbir qate burylys — bir otbasynyń kóz jasyna aınalýy múmkin.
- Qyzyl jaryqqa ótkender — 117. Jol — básekelestik emes. Munda «birinshi kelgen jeńedi» degen uǵym júrmeıdi.
- Jol erejesin buzǵan jaıaý júrginshiler — 465. Bul da úlken másele. Jaıaý kele jatqandar ózin qaýipsiz sezinedi, biraq jolda ereje bárine ortaq.
— Bul rette polıtsııanyń maqsaty reıd arqyly halyqty qorqytý emes qorǵaý. Sebebi ereje saqtamaýdyń artynda qanshama jazyqsyz taǵdyrlar men oryndalmaǵan armandar jatyr. Kólik — qural. Biraq ol qaýiptiń kózine aınalýy da bir-aq sát. Rólge otyrǵan ár adam osyny umytpaýy tıis. Jaıaý júrginshi de «maǵan bári mindetti» degen oıdan arylýy kerek. Jol — birlesken jaýapkershilik alańy. Abaı oblysynyń joldarynda qaýipsizdik tek polıtseılerge nemese belgilerge qarap qamtamasyz etilmeıdi. Ol árqaısymyzdyń ishki mádenıetimizge, jaýapkershiligimizge baılanysty. Polıtsııanyń mindeti — jazalaý emes, aldyn alý. Ár adam aman-esen úıine oralsyn desek, jolda — zań, júrekte — jaýapkershilik bolý kerek. Qaýipsizdikke bárimiz birdeı úles qosýymyz kerek, — dep túsindirdi Abaı oblysy PD baspasóz qyzmeti.
Osydan buryn Qostanaıda qar jaýýyna baılanysty polıtsııa qyzmeti kúsheıtilgeni belgili boldy.