Abaı oblysynda 394,3 myń sharshy metr turǵyn úıdiń qurylysy júrgizilip jatyr

SEMEI. KAZINFORM – 2024 jyly Abaı oblysynda 394,3 myń sharshy metr turǵyn úı qurylysy júrgizilip jatyr.

Osy jyly óńirde jalpy aýdany 119,3 myń sharshy metr (1328 páter) 23 kredıttik úı salynyp jatyr. Onyń 21-i Semeı qalasynda bolsa 2-eýi Aıagóz aýdanynda. Sondaı-aq Semeıde jeke ınvestorlar esebinen jalpy aýdany 165,2 myń sharshy metr (1984 páter) 22 kommertsııalyq úıdiń qurylysy júrgizilip jatyr.

«Jeke turǵyn úı qurylysy 109,8 myń sharshy metr (570 úı). Onyń ishinde turǵyndar esebinen 56 myń sharshy metr (300 úı) salynyp jatyr», - dep habarlady Abaı oblysy ákimdiginen.

Budan bólek, halyqtyń áleýmettik osal toptary úshin jalpy aýdany 53,8 myń sharshy metr jalǵa beriletin 896 páter satyp alý josparlanyp otyr. Buǵan 2024 jyly 13,9 mlrd teńge bólindi.

«Turǵyndardyń jalǵa beriletin úılerdiń sapasy týraly kóptegen eskertýge jaýap retinde satyp alynatyn turǵyn úı qurylysynyń úlgilik jobasy bekitildi. Osylaısha, bıyl Abaı oblysynda barlyǵy 394,3 myń sharshy metr turǵyn úı qurylysy júrgizilip jatyr», - delingen aqparatta.