Abaı oblysynda 37,9 shaqyrym jylý jelisi jóndeledi
SEMEI. KAZINFORM – Abaı oblysynda jylý kózderi men jylý jelilerine jóndeý jumystary júrgizilýde.
2024 jyly Abaı oblysynda 11 jylý kózin jáne 37,9 shaqyrym jylý jelilerin salý, qaıta jańǵyrtý jáne jóndeý boıynsha 28 joba iske asyrylyp jatyr.
«Onyń ishinde Semeı qalasy boıynsha 19 joba, Borodýlıha aýdanynyń Jańa Shúlbi kentinde eki blokty-modýldi qazandyq jáne 1,1 shaqyrym jylý jelilerin salý, Aıagóz aýdanynda 4,2 shaqyrym jylý jelilerin jóndeý, Jarma aýdanynyń Shýaq kentindegi qazandyqty jóndeý, Kýrchatov qalasynda tórt jylý kózin jáne 2,2 shaqyrym jylý jelilerin jóndeý, Abaı aýdany Qaraýyl aýylyndaǵy qazandyq pen 500 metr jylý jelilerin jóndeý jobalary bar, - dedi aımaqtyń áleýmettik-ekonomıkalyq damý máseleleri jónindegi keńeıtilgen keńeste oblys ákiminiń orynbasary Dımıtrıı Garıkov.
Osy jumystardyń nátıjesinde jylý jelileriniń tozýy 64,2%-dan 56,4%-ǵa deıin azaıady dep kútilip otyr.
«Semeı qalasyn jylýmen jabdyqtaýdyń negizgi problemalarynyń biri – qalanyń oń jaǵalaýynda saǵatyna 147 Gkal quraıtyn jylý energııasynyń tapshylyǵy. Bul máseleni sheshý úshin qýaty 360 MVt jáne saǵatyna 1 200 Gkal bolatyn JEO-3 salý josparlanýda. Qazirgi ýaqytta jobanyń tehnıkalyq-ekonomıkalyq negizdemesin ázirleý jumystary aıaqtalýǵa jaqyn», - dedi D.Garıkov.
Aıta keteıik, Abaı oblysyn ortalyqtandyrylǵan jylýmen jabdyqtaýdy 11 kásiporyn qamtamasyz etedi. Onyń quramynda 44 jylý kózi jáne bıýdjettik uıymdardy jylýmen qamtamasyz etetin 273 derbes qazandyq bar.
