Abaı oblysynda 358,8 shaqyrym jergilikti jol jóndeýden ótip jatyr
ASTANA. KAZINFORM — Bıyl óńirde jergilikti joldardy jóndeýge 21,4 mlrd teńge bólindi. Bul týraly oblys ákimi Berik Ýálı málim etti.
— Bıyl kópten kútken respýblıkalyq mańyzy bar «Qalbataý-Maıqapshaǵaı» avtojolynyń 184 shaqyrymy aıaqtaldy. Bul baǵyt óńirdiń ishki jáne syrtqy kólik baılanysyn jaqsartyp, oblystyń kórshiles Shyǵys Qazaqstan, Pavlodar oblystarymen, sondaı-aq Qytaı Halyq Respýblıkasymen shekaralyq saýda-ekonomıkalyq qarym-qatynasyn nyǵaıtýǵa múmkindik beredi. Sondaı-aq, «Taldyqorǵan — Qalbataý — Óskemen» avtojolynyń qurylysy aıaqtalýǵa jaqyn. Qazir negizgi bóligine asfalt tóselip, sońǵy abattandyrý jumystary júrgizilip jatyr, — dedi Berik Ýálı ortalyq kommýnıkatsııalar qyzmeti alańynda ótken baspasóz máslıhatynda.
Óńir basshysy keltirgen málimetke súıensek, búginde Qytaıdyń Chaına Reılveı Eısha-Eýrop Konstrakshn Investment kompanııasymen («China Railway Asia-Europe Construction Investment Co.LTD») Semeı qalasyn aınalyp ótetin avtojol salý boıynsha kelisimge qol qoıyldy. Joba qazaq-qytaı kásiporyndarynyń birlesken konsortsıýmy negizinde 2028 jylǵa deıin júzege asyrylady.
— Jergilikti joldardy jóndeýge bıyl 21,4 mlrd teńge qarastyryldy, bul qarajatqa 358,8 shaqyrym jol jóndeýden ótip jatyr. Onyń ishinde Semeı qalasynyń 52 kóshesinde ortasha jóndeý, 40 aýlany asfalttaý jumysy júrgizildi. Sondaı-aq 35 aýla abattandyryldy. Qaraǵaıly jáne Energetık shaǵyn aýdandaryn «Omby — Maıqapshaǵaı» tas jolymen jalǵaıtyn jańa kóshe paıdalanýǵa berildi. Joba aıasynda jaıaý júrginshiler men velojoldar salyndy jáne shamdardyń tiregi ornatyldy. Bıýdjet múmkindigine qaraı kezeń-kezeńmen joldar retke keltiriledi, — deıdi ol.
Odan ári Berik Ýálı Semeıdegi jańa kópir jobasyna qatysty túsinik berdi.
— Kópirlerdiń jaǵdaıyna keletin bolsaq, Semeıde tórt jolaqty jańa kópir salý jobasy iske asyp jatyr. (Jobanyń quny — 46,6 mlrd teńge, 2025 jylǵa deıin ıgerilgeni — 16,8 mlrd teńge, 2025 jylǵa bólingeni — 10,3 mlrd teńge). Joba Memleket basshysynyń qoldaýymen, Qytaı Halyq Respýblıkasymen ózara is-qımyl aıasynda qaıtarymsyz qarjy (grant) esebinen aıaqtalady. Tehnıkalyq-ekonomıkalyq yntymaqtastyq kelisimge qol qoıyldy. Qalǵan qujattar pysyqtalyp jatyr, qarajat kelesi jyly túsedi dep josparlanyp otyr. Aspaly kópirdiń ústindegi jolǵa bıyl jóndeý jumystary júrgizildi. Kúrdeli jóndeýden ótkizý úshin jobalyq-smetalyq qujattama ázirlenip jatyr, — dep túsindirdi oblys ákimi.
Buǵan deıin Abaı oblysyn damytýdaǵy jergilikti ınvestorlardyń úlesi týraly jazǵan edik.
Aıta keteıik, jyl basynan beri Abaı oblysynda 159,9 myń sharshy metr turǵyn úı paıdalanýǵa berildi.