Abaı oblysynda 350 adamnan 790 mln teńgeden astam qarjy jınaǵan top quryqtaldy

ASTANA. KAZINFORM – Abaı oblysynda Rakhat0425 qarjy pıramıdasynyń qyzmeti toqtatyldy.

Uıymdastyrýshylar azamattardan qarajat tartyp, memlekettik satyp alýǵa qatysy bar jalǵan ınvestıtsııalyq jobaǵa 30% dıvıdend ýáde etken.

- Nátıjesinde 350 adamnan 790 mıllıon teńgeden astam qarajat jınalǵan. Sonymen qatar, kúdiktiler azamattardy páterlerin tómen baǵamen berýge kóndirip, keıin olardy úshinshi tulǵalardyń atyna rásimdegen. Bul múlik «ınvestıtsııalyq jarna» retinde baǵalanǵan, - dep habarlady Qarjylyq monıtorıng agenttiginiń óńirdegi departamentinen.

Qazirgi ýaqytta eki kúdikti qamaýǵa alynyp, úshinshisine úıqamaq túrindegi bultartpaý sharasy qoldanyldy.

QR QPK-niń 201-babyna sáıkes ózge aqparat jarııa etilmeıdi.

Aıta keteıik, agenttikte qarjy pıramıdalarynyń belgilerin tekserýge múmkindik beretin «Baiqa, piramida!» Telegram-boty jumys istep tur.

Eger Siz nemese jaqyndaryńyz qarjy pıramıdasynyń áreketine tap bolsa, turǵylyqty jerińiz boıynsha Ekonomıkalyq tergep-tekserý departamentine júginińiz.

Eske salaıyq, buǵan deıin SQO-da Sincere Systems Group qarjy pıramıdasynyń qyzmeti toqtatylǵan.