Abaı oblysynda 31 jolaýshysy bar avtobýs jolda qalǵan
ASTANA. KAZINFORM — Abaı oblysynda polıtsııa jolda qalǵan jolaýshylarǵa kómek kórsetti, dep habarlaıdy oblystyq PD baspasóz qyzmeti.
Omby — Maıqapshaǵaı avtojolynda Astana — Zaısan baǵytynda qatynaıtyn Setra avtobýsy jolda buzylyp qaldy. Avtobýs salonynda 31 jolaýshy, onyń ishinde 4 kámeletke tolmaǵan bala bolǵan. Jolaýshylardyń bir bóligi jolaı ótken kólikpen saparyn jalǵastyrdy.
— Oqıǵa ornyna shuǵyl jetken polıtsııa qyzmetkerleri N.Berleshov pen N.Alıev azamattardyń qaýipsizdigin qamtamasyz etip, evakýatsııa aıaqtalǵanǵa deıin jolaýshylardyń janynda bolyp, jaǵdaıdy baqylaýda ustady. Osylaısha 25 azamat Besqaraǵaı aýylyna jetkizildi, — delingen habarlamada.
Polıtsııa qys mezgilinde jolda tótenshe jaǵdaı týyndaǵan jaǵdaıda «102» nómirine habarlasýǵa shaqyrady.
Budan buryn «QazAvtoJol» joldary qaýip týdyrýy yqtımal óńirlerdi atady.
