Abaı oblysynda 266 zańsyz qoqys úıindisi anyqtaldy

SEMEI. KAZINFORM – Abaı oblysynda 2024 jyldyń sáýir aıynan beri 266 zańsyz qoqys úıindisi anyqtaldy. 

Ǵaryshtyq monıtorıng derekterine sáıkes, óńirde anyqtalǵan 266 zańsyz qoqys úıindisiniń búginde 50 paıyzy, ıaǵnı 133-i joıylǵan.

Ásirese Semeı qalasy men Aıagóz, Jarma, Jańasemeı aýdandarynda qoqys úıindileri azaımaı tur. 

«Atalǵan qala, aýdan ákimderi bul baǵyttaǵy jumysty shıratýy kerek. Máseleni sheshýdiń joldaryn qarastyrý qajet. Polıtsııamen birlese jumys isteńizder. Al qoqys polıgonyn salý qajet bolsa ony da oılastyryńyzdar», - dedi jıynda sóz alǵan oblys ákimi Nurlan Uranhaev. 

«Taza Qazaqstan» ekologııalyq aktsııasy aıasynda tazaqazaqstan.kz onlaın-platformasy iske qosylǵany belgili. Bul platforma arqyly azamattar ekologııalyq máselelerdi sheshý boıynsha ótinishterin berip jatyr. Aımaq boıynsha platforma iske qosylǵaly beri 102 ótinish túsip, onyń 92-si oryndalǵan.

«Oblystyń ekologııalyq ahýalyn jaqsartý baǵytyndaǵy jumys jalǵasady. Qaldyqtardy basqarýdyń ınfraqurylymyn damytýǵa, azamattardyń ótinishteri boıynsha jumystyń tıimdiligi men sapasyn arttyrýǵa erekshe kóńil bólinip jatyr», - dedi oblystyq Tabıǵı resýrstar jáne tabıǵatty paıdalanýdy retteý basqarmasynyń basshysy Aınur Aqmyrza.

Óńirdegi ózekti jobalardyń biri – Semeı qalasynda turmystyq qatty qaldyqtarǵa arnalǵan zamanaýı polıgon men qoqys suryptaý zaýytynyń qurylysy. Abaı oblysyn damytýdyń keshendi josparyna sáıkes atalmysh joba 2025 jylǵa deıin júzege asyrylady. 

Eske salsaq, osyǵan deıin Ekologııa mınıstri qoqys polıgondaryna qoıylatyn talaptardy jeńildetýdi usynǵany habarlanǵan.