Abaı oblysynda 263 otbasylyq tıran esepke qoıyldy

ASTANA. KAZINFORM — Jyl basynan beri Abaı oblysynyń polıtsııasy otbasylyq-turmystyq sıpattaǵy 241 quqyq buzýshylyqty tirkedi, dep habarlaıdy vedomstvonyń baspasóz qyzmeti.

— Árbir sannyń artynda naqty adamdar, kómekke muqtaj shynaıy otbasylar tur. Ótinishterdiń basym bóligi — 208 otbasylyq janjal. Keıde qarapaıym sóz talasy jaǵdaıdyń ýshyǵýyna, ómir men densaýlyqqa qaýip tónýine ákelip soǵady. Shaqyrtýlar kóbine áıelderden túsedi, alaıda keı jaǵdaılarda er adamdar da «tártipsiz» týystarynyń áreketin shekteý úshin polıtsııanyń kómegine júginip jatady, — deıdi tártip saqshylary.

Oblystyq polıtsııa málimetinshe, qorǵaý nusqamasyn buzý derekteri — quqyq qorǵaý organdarynyń erekshe baqylaýynda. 

— Mundaı 17 jaǵdaı tirkeldi, sondaı-aq minez-qulyqqa qoıylǵan erekshe talaptardy buzýdyń 16 faktisi anyqtalǵan. Bul talaptarǵa otbasy múshelerine jaqyndaýǵa tyıym salý, alkogol men esirtki zattaryn qoldanbaý jatady. Aldyn alý áńgimeleri men eskertýler nátıje bermegen kezde, polıtseıler otbasyn qorǵaý jáne yqtımal qaıǵyly jaǵdaıdyń aldyn alý úshin qatań sharalar qoldanady. Aldyn alý jáne qaýipti tulǵalardy baqylaý maqsatynda polıtsııa 263 otbasylyq janjalqoıdy esepke qoıdy, onyń ishinde: 222 adam — qorǵaý nusqamasy boıynsha, 41 adam — minez-qulyqqa qoıylǵan erekshe talaptar boıynsha. Atalǵan azamattar turaqty baqylaýda: ýchaskelik ınspektorlarmen apta saıyn profılaktıkalyq áńgimeler, quqyq buzýshylyq saldary týraly eskertýler júrgiziledi. Munyń bári jaǵdaıdy baqylaýda ustaýǵa kómektesedi. Esepke qoıý — jaı ǵana qaǵaz júzindegi rásim emes. Bul — qaqtyǵystyń ýshyǵýyna jol bermeıtin, otbasy múshelerin, ásirese balalardy qorǵaıtyn, úıdegi tynyshtyqty saqtaýǵa múmkindik beretin naqty qorǵanys quraly, — dep túsindirdi vedomstvo.

Abaı oblysy polıtsııasynyń jumysy keshendi sıpatqa ıe: reıdter, profılaktıkalyq túsindirý jumystary, daǵdarys jaǵdaıyndaǵy otbasylardy qoldaý. Quqyq buzýshylyqtardy ýaqtyly anyqtaý jáne turmystyq zorlyq-zombylyqqa beıim tulǵalardy turaqty baqylaý óz nátıjesin berýde — zardap shekkender sany azaıyp, otbasylarda tynyshtyq saqtalyp keledi. 

Buǵan deıin Abaı oblysynda ruqsatsyz qoqys tastalǵan 191 oryn joıylǵanyn jazǵan edik.