Abaı oblysynda 255 jumys ornymen qamtıtyn 7 joba júzege asyrylady

ASTANA. KAZINFORM — Óńirde jyl basynan beri iske asyrylyp jatqan jobalar sany 29-dan 97-ge deıin artty. Tolyǵyraq oblys ákimi Berik Ýálı aıtyp berdi. 

— Bıznesti qoldaý jáne ınvestıtsııa tartý sharalary júzege asyrylyp keledi. Jyl basynan beri iske asyrylyp jatqan jobalar sany 29-dan 97-ge deıin artty, al tartylatyn ınvestıtsııa kólemi 2,2 trln teńgeden 3,5 trln teńgege deıin ósti. Onyń ishinde, 50 joba ulttyq tsıfrlyq ınvestıtsııalyq platformaǵa engizilgen. Іri ınvestıtsııalyq jobalardyń biri kólemi 577,5 mlrd teńge bolatyn jalpy uzyndyǵy 297,5 shaqyrym «Aıagóz — Baqty» temirjol jelisiniń qurylysy. Bul óńirdiń jáne tutas elimizdiń damýyna tyń serpin berý úshin Memleket basshysynyń tikeleı tapsyrmasymen bastalǵan úlken joba. Bul joba úshin 10,5 myń gektar jer ýchaskesi rezervke qoıylǵan, jobanyń tehnıkalyq-ekonomıkalyq negizdemesi bekitildi, 2023 jyly iske asyrý bastaldy. Qazir jobaǵa 30 mlrd teńge ınvestıtsııa salyndy, — dedi Berik Ýálı ortalyq kommýnıkatsııalar qyzmeti alańynda óńirdiń 9 aı ishindegi áleýmettik-ekonomıkalyq damýy týraly esep bere turyp.

Onyń aıtýynsha, nysandy 2027 jyldyń aıaǵynda paıdalanýǵa berý josparlanyp otyr.

— Budan basqa, ónerkásip salasynda Túrkııanyń Mırıldyz KeıZet LTD («Miryildiz Kz Ltd.») kompanııasy jalpy quny 480 mln AQSh dollar bolatyn «Altyn óndirý fabrıkasyn salý» jobasyn iske asyrýdy bastady. Bıyl jalpy somasy 25,9 mlrd teńgege 453 jumys ornyn qurýmen 14 jobany iske asyrý josparlanǵan. Búginde 13,3 mlrd teńgege 7 joba júzege asyryldy, 124 jumys orny quryldy. Jyl sońyna deıin quny 12,6 mlrd teńgeni quraıtyn 255 jumys ornyn qurýdy kózdeıtin taǵy 7 jobany iske asyrýdy josparlap otyrmyz, — deıdi ol.

Aıta keteıik, bıyl Abaı oblysynda ınvestıtsııa tartý 103,1 paıyzǵa ósken.