Abaı oblysynda 25 myńnan astam jumys orny quryldy
SEMEI. KAZINFORM — Óńirlik jumyspen qamtý kartasy aıasynda 22 myńnan astam jumys ornyn qurý josparlanǵan edi. Bul týraly Óńirlik kommýnıkatsııalar qyzmetinde ótken baspasóz máslıhatynda Abaı oblysy Eńbek mobıldiligi ortalyǵynyń dırektory Erkebulan Tursyn baıandady.
— Bıyl 8 jeltoqsanǵa deıin óńirde 25 myńnan astam jumys orny quryldy. Onyń ishinde 16 myńnan astamy — turaqty, 8 myńy — ýaqytsha jumys oryndary. Bul óńir ekonomıkasynyń belsendi damýyn kórsetedi. Infraquralymdyq jobalar aıasynda 1 700 jumys orny ashyldy. «10 myń eńbekke qabiletti turǵynǵa 100 jumys orny» kórsetkishi 116,3 paıyzǵa jetip, nátıjesinde 9 049 adam jumyspen qamtyldy. Sonymen qatar jumys berýshiler usynǵan bos oryndarǵa 6 619 adam turaqty jumysqa ornalastyryldy, — dedi ortalyq dırektory.
Spıkerdiń aıtýynsha, sýbsıdııalanatyn jumys oryndary boıynsha jospar 112,9 paıyzǵa oryndaldy. Onyń ishinde: áleýmettik jumys oryndary — 102%, jastar praktıkasy — 102%, qoǵamdyq jumystar — 120%, «Kúmis jas» — 101%, «Urpaqtar kelisimsharty» — 100%. Al «Alǵashqy jumys orny» jobasy 88 paıyz deńgeıinde oryndaldy.
— Jyl basynan beri memlekettik granttar boıynsha 205 grant berilip, jospar tolyq oryndaldy. Bir granttyń mólsheri — 400 AEK, jalpy kólemi — 320,5 mln teńge. Grant alýshylardyń basym bóligin kópbalaly otbasylar — 113 adam, múgedektigi bar azamattar — 31 adam jáne múgedektigi bar balany tárbıelep otyrǵandar — 39 adam qurady. Qarajat kóbine tamaq óndirisi, mal sharýashylyǵy, avtoservıs, tigin isi, medıtsına jáne polıgrafııa baǵyttaryna baǵyttaldy. Qysqa merzimdi kásiptik oqytý sheńberinde 343 adam oqýǵa jiberildi. Oqytý jumys berýshilerdiń suranysyna saı, jumys ornynda, shalǵaı aýyldarda jáne Elektrondyq eńbek bırjasy arqyly uıymdastyryldy. Eń suranysqa ıe mamandyqtar — traktorshy, dánekerleýshi, aspaz, kondıter jáne býhgalter, — dedi spıker.
Bıyl shalǵaı aýyldarda jyljymaly oqý ortalyǵy iske qosylyp, turǵyndardyń kásibı bilimge qoljetimdiligi artty. Skills.enbek platformasynda 2 507 adam onlaın kýrsty aıaqtady. «Bastaý-Bıznes» jobasy aıasynda 838 azamat kásipkerlik negizderin oqydy. Enbek.kz platformasy arqyly túıindeme jasaý, bos jumys oryndaryn qaraý, elektrondyq sharttar jasasý jáne óndiristik praktıkadan ótý múmkindikteri usynylyp jatyr.
— Jumys kúshiniń utqyrlyǵyn arttyrý úshin 2025 jylǵa 499 kvota bólindi. Onyń ishinde 244 — qandastarǵa, 255 — qonys aýdarýshylarǵa berildi. Jyl basynan beri 77 qonys aýdarýshy jáne 102 qandas otbasy, jalpy 508 adam qabyldandy. Qonys aýdarýshylarǵa úı jaldaýǵa sýbsıdııa, kóshýge bir rettik tólem jáne ekonomıkalyq mobıldilik sertıfıkattary usynylady. Sondaı-aq jyl basynan beri 173 bos jumys oryndary jármeńkesi ótkizilip, 6 744 adam qamtyldy. Nátıjesinde 1 856 adam jumysqa ornalasyp, 1 195 adam jumyspen qamtýdyń belsendi sharalaryna baǵyttaldy, 77 adam qysqa merzimdi oqýǵa jiberildi. Semeı qalasy men aýdandarda Job Fair formatynda jáne Eńbek kúnine oraı iri jármeńkeler, sondaı-aq oqý oryndarynda 40-tan astam kezdesý, semınar jáne ashyq esik kúnderi uıymdastyrylyp, 5 myńnan astam stýdent qamtyldy, — dep qorytyndylady Erkebulan Tursyn.