Abaı oblysynda 236 bala kámeletke tolmaǵandardy beıimdeý ortalyǵyna ornalastyryldy
ASTANA. KAZINFORM — Abaı oblysynyń polıtseıleri túngi ýaqytta júrgen 2174 jasóspirimdi anyqtady.
Oblystyq Polıtsııa departamenti baspasóz qyzmetiniń málimetinshe, Abaı oblysynda kámeletke tolmaǵandardyń qaýipsizdigin qamtamasyz etý baǵytyndaǵy profılaktıkalyq jumystar jalǵasyp jatyr. Jyl basynan beri oblys polıtseıleri túngi ýaqytta zańdy ókilderiniń erip júrýinsiz oıyn-saýyq mekemelerinde jáne turǵynjaıdan tys júrgen 2174 jasóspirimdi anyqtady. Balalardyń ata-anasymen jáne asyraýshylarymen polıtseıler túsindirý jumystaryn júrgizip, keshki ýaqytta jasóspirimniń turǵyn-jaıdan tys jalǵyz ketýi asa qaýipti ekenin eskertti. Sondaı-aq, 236 jasóspirim kámeletke tolmaǵandardy beıimdeý ortalyǵyna ornalastyryldy.
Tún qoıýlanǵan saıyn oblys kóshelerinde polıtsııa patrýlderiniń baqylaýy kúsheıedi. Sebebi tártip saqshylary úshin árbir jasóspirimniń qaýipsizdigi — basty mindetterdiń biri. Reıdtik is-sharalar barysynda polıtsııa qyzmetkerleri oıyn-saýyq oryndaryn, kompıýterlik klýbtardy, saıabaqtar men adam kóp shoǵyrlanatyn aýmaqtardy tekserip, jasóspirimderdiń zań talaptaryn saqtaýyna erekshe nazar aýdaryp jatyr.
Abaı oblysynyń polıtsııasy profılaktıkany jazalaýdan joǵary qoıady. Óıtkeni tártip saqshylarynyń basty maqsaty — quqyqbuzýshylyqty tirkeý emes, onyń aldyn alý. Osy baǵytta ıývenaldy polıtsııa qyzmetkerleri mekteptermen jáne ata-analarmen tyǵyz baılanys ornatyp, jasóspirimder arasyndaǵy quqyqtyq saýattylyqty arttyrýǵa basymdyq berip otyr.
— «Bala túnde kóshede emes, otbasynyń janynda bolýy kerek» — bul polıtsııa qyzmetkerleri ustanatyn basty qaǵıdalardyń biri. Sebebi baqylaýsyz qalǵan jasóspirim túrli quqyqbuzýshylyqtyń qurbanyna aınalýy múmkin. Al der kezinde júrgizilgen profılaktıka kóptegen keleńsiz jaǵdaıdyń aldyn alady. Túngi qala tynysh kóringenimen, tártip saqshylary úshin jumys bir sátke de toqtamaıdy. Óıtkeni árbir reıdtiń artynda — bir balanyń qaýipsizdigi, bir otbasynyń tynyshtyǵy, qoǵamnyń erteńine degen jaýapkershilik tur, — deıdi tártip saqshylary.
Buǵan deıin Abaı oblysynda qalta urlyǵy 11,8%-ǵa tómendegenin jazǵanbyz.
