Abaı oblysynda 2024 jyly halyqty sýmen qamtamasyz etý kórsetkishi 96,6%-ǵa jetedi
SEMEI. KAZINFORM – Abaı oblysynyń turǵyndaryn ortalyqtandyrylǵan sýmen qamtamasyz etý kórsetkishi osy jyldyń sońyna deıin 96,6%-ǵa jetkizilmek.
2024 jyly Abaı oblysynda 22 497 adamdy qamtıtyn 24 sýmen jabdyqtaý jobasy iske asyrylady. Onyń ishinde eldi mekenderdegi 6 717 adamǵa eseptelgen 14 nysan, 15 myńnan astam adam turatyn Semeı qalasyndaǵy 8 kent pen bir kóshe bar. Sonyń nátıjesinde oblysty ortalyqtandyrylǵan sýmen qamtamasyz etý úlesi 96,6%-ǵa jetedi. Bul týraly málimet óńirdiń áleýmettik-ekonomıkalyq damýy máseleleri jónindegi keńeıtilgen otyrysta usynyldy.
«Oblystaǵy sý qubyry jelileriniń jalpy uzyndyǵy – 3,220,3 km. Sý qubyry jelileriniń ortasha tozýy 48,1% quraıdy, onyń ishinde Semeı – 67%, Aıagóz – 31%, Kýrchatov – 85%. 2024-2025 jyldarǵa sý qubyry jelilerin salýǵa qatysty 22 jobany iske asyrý josparlanǵan. Osylaısha, óńirde sýǵa qoljetimdilik 100% bolmaq», - dep habarlady Abaı oblysy ákimdiginen.
Aımaqtaǵy sý burý jelileriniń uzyndyǵy – 519,4 shaqyrym. Bul rette tozǵan qubyrlardyń úlesi 71,3% quraıdy. 2024 jyly Aqsýat aýylynda jalpy uzyndyǵy 22,8 shaqyrym bolatyn káriz jelilerin qaıta jańartý jumystary bastalady.
Sondaı-aq oblysta avtomobıl joldaryn ortasha jóndeýge arnalǵan jobalardy iske asyrý jalǵasýda. Jalpy uzyndyǵy 75 shaqyrym jeti ýchaskede jáne jalpy uzyndyǵy 143,7 shaqyrym 17 ýchaskede tıisti jumystar júrgizilip jatyr.
«Budan bólek, jalpy uzyndyǵy 26 shaqyrymdy quraıtyn 29 kóshege ortasha jóndeý jumystary júrgizilip jatyr. 16 tirek jáne 3 spýtnıktik eldi mekenderde 57,3 shaqyrym kentishilik kóshe-jol jelisin jóndeýge qatysty 19 joba iske asyrylýda», - delingen aqparatta.
Aıta keteıik, Abaı oblysyndaǵy avtomobıl joldarynyń jalpy uzyndyǵy 6,831,8 shaqyrymdy quraıdy. Onyń ishinde 2 176 shaqyrym respýblıkalyq mańyzy bar jol, 1 592,5 shaqyrym oblystyq mańyzy bar jol jáne 3 063,3 shaqyrym aýdandyq mańyzy bar jol.
