Abaı oblysynda 200 mln teńgege zańsyz memlekettik kelisimshart jasalǵan - prokýratýra
SEMEI. KAZINFORM – Abaı oblysy Aıagóz aýdanynda prokýratýra 200 mln teńgege bir kózden satyp alý arqyly zańsyz jasalǵan memlekettik kelisimshartty anyqtady.
Aýdannyń turǵyn úı-kommýnaldyq sharýashylyǵy bólimi qys kezinde avtomobıl joldaryn kútip-ustaý qyzmetterin kórsetýge bir ǵana merdigermen shart jasasqan. Bul áreket memlekettik satyp alý zańnamasyn óreskel buzyp, basqa áleýetti merdigerlerdiń qatysýyna jol bermegen.
- Anyqtalǵan zańbuzýshylyq boıynsha aýdan prokýratýrasy tıisti usynym engizip, nátıjesinde zańsyz shart buzyldy. Osylaısha, zańsyz jasalǵan memlekettik kelisimshart kúshin joıdy, - dep habarlady oblys prokýratýrasynyń baspasóz qyzmeti.
Al bólim basshysy QR ÁQBtK 207-baby 11-bóligine sáıkes jaýapkershilikke tartylyp, 100 AEK (393 200 teńge) kóleminde aıyppul tóleýge mindetteldi.
Sondaı-aq osyǵan uqsas zańbuzýshylyqtar úshin aýdan ákiminiń orynbasary men alty aýyldyq okrýgtiń ákimderi de ákimshilik jaýapkershilikke tartylyp, olarǵa jalpy somasy 1,3 mln teńge kóleminde aıyppuldar salyndy.
Eske salsaq, osyǵan deıin Abaı oblysynda prokýratýra jer qoınaýyn paıdalanýshylardan 100 mln teńge óndirip alǵany habarlanǵan.