Abaı oblysynda 200-ge jýyq mektep qyzmetkeriniń jeke málimeti tarap ketken

SEMEI. KAZINFORM – Borodýlıha aýdanynyń prokýratýrasy úsh orta mekteptiń 194 qyzmetkeriniń jeke málimeti tarap ketkenin anyqtady. Bul zańbuzýshylyq memlekettik satyp alýlar portalyna monıtorıng júrgizý barysynda belgili boldy.

Bilim berý mekemeleri memlekettik satyp alý boıynsha medıtsınalyq tekserýden ótý úshin qyzmetkerlerdiń tizimderin jarııalaǵan. Onda barlyq qyzmetkerdiń jeke málimetteri, onyń ishinde tolyq anketalyq málimetter, JSN jáne basqa da aqparattar kórsetilgen.

Qoldanystaǵy zańnamaǵa sáıkes, mundaı málimetter mindetti túrde qorǵalýǵa tıis. Shekteýli qoljetimdi aqparatqa qol jetkizgen tulǵalar onyń qupııalylyǵyn qamtamasyz etýge mindetti jáne málimetter ıesiniń kelisiminsiz nemese zańdy negiz joq jaǵdaıda jeke aqparatty taratýǵa quqyly emes.

Mektep basshylyǵynyń bul talaptardy saqtamaýy jeke málimetterdiń zańsyz maqsatta paıdalanylý qaýpin týǵyzdy.

– Tekserý qorytyndysy boıynsha aýdan prokýratýrasy mektep dırektorlaryn QR Ákimshilik quqyq buzýshylyqtar týraly kodeksiniń 79-baby 2-bóligi boıynsha ákimshilik jaýapkershilikke tartyp, 1 mıllıon teńgeden astam aıyppul saldy, sondaı-aq olar tártiptik jazaǵa tartyldy, - dep málimdedi Abaı oblysynyń prokýratýrasy.

Qazir aýdandyq bilim bólimi bolashaqta uqsas buzýshylyqtardyń aldyn alý maqsatynda sharalar qabyldaǵan.

Aıta keteıik, 16 mln qazaqstandyqtyń jeke deregi taralý faktisine qatysty qylmystyq is qozǵaldy.