Abaı oblysynda 2 myńnan asa malǵa GPS baqylaý ornatylǵan
ASTANA. KAZINFORM — Abaı oblysynda qaýipsizdik sharalaryn arttyrý maqsatynda 2185 malǵa GPS-baqylaý quraldary ornatyldy, bul olardyń qozǵalysyn naqty ýaqyt rejıminde baqylaýǵa múmkindik beredi, dep habarlaıdy oblystyq PD baspasóz qyzmeti.
Abaı oblysynda óńir aýmaǵynda mal urlyǵynyń aldyn alýǵa baǵyttalǵan «Mal urlyǵyna jol joq» atty respýblıkalyq profılaktıkalyq is-sharasy júıeli túrde júzege asyrylyp jatyr. Atalǵan bastamanyń basty maqsaty — aýyl sharýashylyǵy janýarlarynyń saqtalýyn qamtamasyz etý, quqyq buzýshylyqtardyń aldyn alý jáne turǵyndardyń quqyqtyq mádenıetin arttyrý.
Іs-shara aıasynda quqyq qorǵaý organdary jergilikti atqarýshy qurylymdarmen birlesip, aýqymdy profılaktıkalyq jumystar júrgizip keledi. Mal ıeleri arasynda túsindirý sharalary uıymdastyrylyp, aýyl sharýashylyǵy janýarlaryn jaıý qaǵıdalaryn saqtaý, olardy qaraýsyz qaldyrmaý jáne qaýipsizdikti kúsheıtý qajettiligi keńinen nasıhattalyp jatyr. Sonymen qatar, zamanaýı tehnologııalardy engizýdiń mańyzdylyǵy atap ótilip, GPS-baqylaý quraldaryn qoldaný arqyly mal qozǵalysyn turaqty qadaǵalaý múmkindikteri túsindiriledi.
— Júrgizilgen jumystardyń nátıjesinde birqatar naqty kórsetkishke qol jetkizildi. Atap aıtqanda, mal ıeleriniń qatysýymen 2873 ret aralaý jumystary júrgizildi. Bazarlar men ózge de saýda oryndarynda 198 reıd uıymdastyrylyp, zańsyz mal ónimderiniń aınalymynyń aldyn alý baǵytynda tekserýler kúsheıtildi. Sonymen qatar, 1428 aýyl sharýashylyǵy janýary jeke sáıkestendirýden ótkizilip, olardyń esebi júıelendirildi. Qaýipsizdik sharalaryn arttyrý maqsatynda 2185 malǵa GPS-baqylaý quraldary ornatylǵany anyqtaldy, bul olardyń qozǵalysyn naqty ýaqyt rejıminde baqylaýǵa múmkindik beredi, — delingen habarlamada.
Іs-shara barysynda maldy mindetti sáıkestendirýdiń mańyzdylyǵyna erekshe nazar aýdaryldy. Sondaı-aq, mal ıeleri, baqtashylar jáne jergilikti atqarýshy organdar arasynda úshjaqty sharttar jasasý tártibi túsindirilip, jaýapkershilikti bólisý tetikteri aıqyndalady. Bul tásil maldyń baqylaýsyz jaıylýyn boldyrmaýǵa, esep júrgizýdi jetildirýge jáne quqyq buzýshylyqtardyń aldyn alýǵa yqpal etedi.
Abaı oblysynyń polıtsııasy azamattardy óz múlkine jaýapkershilikpen qaraýǵa shaqyrady. Mal basyn ýaqtyly esepke alý, sáıkestendirý, belgileý jáne zamanaýı baqylaý quraldaryn paıdalaný — qaýipsizdikti qamtamasyz etýdiń mańyzdy kepili. Tek birlesken jáne júıeli profılaktıkalyq jumystardyń nátıjesinde ǵana mal urlyǵynyń jolyn kesip, aýyl turǵyndarynyń tynyshtyǵy men ál-aýqatyn qorǵaýǵa bolady.
Osydan buryn Pavlodar oblysynda mal urlyǵymen aınalysqan qylmystyq top ustalǵany anyqtaldy.
