Abaı oblysynda 18 adam qar qursaýynan qutqaryldy
SEMEI. KAZINFORM – Abaı oblysynda qar qursaýynda qalǵan 18 adam qutqaryldy.
Túngi ýaqytta Kókpekti aýdanynda, Kókpekti aýylynan 30 shaqyrym jerde jabyq avtojol ýchaskesinde 6 júk jáne 2 jeńil avtokólik qarǵa batyp, qozǵalysyn jalǵastyra almaı qalǵan.
Oblystyq tótenshe jaǵdaılar departamentiniń kúshterimen barlyǵy 18 adam qutqarylyp, Kókpekti aýylyna jetkizildi. Qutqarylǵan azamattarǵa medıtsınalyq kómek qajet bolmaǵan.
- Anyqtalǵandaı, júrgizýshiler jol qozǵalysyna shekteý engizilgenge deıin atalǵan jol ýchaskesine shyǵyp ketken, - delingen aqparatta.
Tótenshe jaǵdaılar mınıstrligi azamattarǵa saparǵa shyǵar aldynda avtojoldardyń jaı-kúıi týraly aqparatty naqtylap, jaýapty qyzmetterdiń usynymdaryn qatań saqtaýdy eskertedi.
Aıta keteıik, Jetisý oblysynda qutqarýshylar qar qursaýynda qalǵan 17 adamdy evakýatsııalady.