Abaı oblysynda 172 júrgizýshige zańsyz salynǵan aıyppuldardyń kúshi joıyldy
ASTANA. KAZINFORM – Abaı oblysynyń Aıagóz aýdanynda jol qozǵalysy erejelerin buzýshylyqtardy avtomatty túrde tirkeıtin kameralardyń jumysynan zań buzýshylyq anyqtaldy.
Aýdan prokýratýrasynyń málimetinshe, Aıagóz qalasyndaǵy kóshelerdiń birinde kólik qozǵalysyna ruqsat etilgen jyldamdyq saǵatyna 60 shaqyrym bolǵanymen, avtomatty tirkeý kesheninde shekti jyldamdyq qate túrde 40 shaqyrym bolyp belgilengen.
«Osynyń saldarynan 172 azamat ákimshilik jaýaptylyqqa zańsyz tartylǵan», – dep habarlady prokýratýra.
Prokýrorlyq qadaǵalaý aktisi negizinde zańsyz shyǵarylǵan barlyq ákimshilik qaýlylardyń kúshi joıyldy.
Sonymen qatar júrgizýshiler tólegen aıyppuldardy qaıtarý jumystary bastaldy.
«Qazirgi tańda kólik ıelerine 800 myń teńgeden astam qarajat qaıtaryldy. Qarajattardy qaıtarý jumystary jalǵasýda», – delingen habarlamada.
Prokýratýra azamattarǵa ákimshilik jaýaptylyqqa zańsyz tartý faktileri anyqtalǵan jaǵdaıda óz quqyqtaryn qorǵaý úshin ýákiletti memlekettik organdarǵa nemese prokýratýraǵa júginýge bolatynyn eskertti.
Aıta keteıik, kólikte beldik taqpaı júrgenderdiń aıyppuly esepten shyǵarylady.
