Abaı oblysynda 1,5 mlrd dollarlyq mys balqytý zaýyty salynady
ASTANA. KAZINFORM — Abaı oblysynda quny 1,5 mlrd dollardan asatyn mys balqytý zaýytyn salý jobasy júzege asyrylyp jatyr. Bul týraly halyqaralyq Astana Mining & Metallurgy (AMM 2026) kongresinde Premer-Mınıstr Oljas Bektenov málimdedi.
— Jańa kásiporyn qazirgi ýaqytta eksporttalyp jatqan mys kontsentratynyń barlyǵyn el ishinde óńdeýge múmkindik beredi. Joba — ekonomıkany shıkizattyq modelden tereń óńdeýge kóshirýge jáne joǵary qosylǵan quny bar ónim shyǵarýǵa baǵyttalyp otyr.
Sonymen qosa Úkimet basshysy sońǵy eki jylda Qazaqstanda katodty mys, ferrosılıtsıı, ferroqorytpalar jáne ózge de ónimder shyǵaratyn jalpy quny 1 mlrd dollardan asatyn birqatar iri óndiris iske qosylǵanyn atap ótti.
— Pavlodar oblysynda jylyna 300 myń tonna altyn-mys kontsentratyn jáne 15 tonnaǵa deıin altyn óndirýge múmkindik beretin gıdrometallýrgııalyq kombınat salynyp jatyr. Budan bólek, «Qarmet» kompanııasy Qaraǵandy oblysynda avtomobıl óndirisine arnalǵan bolat sııaqty joǵary óńdelgen ónimder shyǵarýǵa baǵyttalǵan óndiristi jańǵyrtýdan ótkizip jatyr, — dedi ol.
Premer-Mınıstrdiń aıtýynsha, Qazaqstannyń strategııalyq mindeti — tek óndiris kólemin arttyrý ǵana emes, sonymen birge álemdik naryqta básekege qabiletti ónerkásiptik ónim óndirýshi el retindegi pozıtsııasyn nyǵaıtý.
Aıta keteıik, búgin elordada taý-ken metallýrgııa salasyndaǵy eń iri halyqaralyq alańdardyń biri — 16-Astana Mining & Metallurgy (AMM 2026) halyqaralyq taý-ken metallýrgııa kongresi óz jumysyn bastady. Atalǵan is-sharaǵa 15 elden 69 kompanııa qatysyp jatyr. Olardyń qatarynda Aýstralııa, Germanııa, Italııa, Kanada, Qytaı, Saýd Arabııasy, AQSh, Fınlıandııa, Frantsııa, Chehııa jáne Shvetsııa sekildi memleketter bar.
