Abaı oblysynda 157 myń gektar jer memleketke qaıtaryldy

Abaı oblysy óziniń alǵashqy jylynda áleýmettik-ekonomıkalyq kórsetkishter boıynsha senimdi ósim kórsetip otyr. Bul týraly óńir ákimi Nurlan Uranhaev elordadaǵy esep berý brıfınginde aıtty, dep habarlaıdy Kazinform.

«Aýyl sharýashylyǵy maqsatynda paıdalanbaǵan jerlerdi qaıtarý jumysy jalǵasýda. Jalpy aýdany 387,9 myń gektar jer ýchaskesi anyqtaldy. Onyń 157 myń gektary qazirgi tańda qaıtaryldy. Qalǵan 97 myń gektar jyl aıaǵyna deıin alynyp, jyldyq jospar tolyq oryndalady», - dedi Nurlan Uranhaev Astanadaǵy Ortalyq kommýnıkatsııalar qyzmetinde.

Oblys ákiminiń aıtýynsha, óńirde agroónerkásiptik keshende 5,3 mlrd teńgege 4 ınvestıtsııalyq joba iske asty. Atap aıtqanda, Úrjar aýdanynda «Muhit Agro» JShS turaqty sýarý ýchaskesiniń ınfraqurylymy salyndy.

Besqaraǵaı aýdanynda «Mýkınov» sharýa qojalyǵynda myń bas iri qara maldy bordaqylaý alańy, Aqsýat aýdanynda «Jansaıa» sharýa qojalyǵynda 1,5 myń bas iri qara mal bordaqylaý alańy, sondaı-aq Kókpekti aýdanynda «Elimaı» JShS 1 543 gektar alańynda sýarý júıeleri salyndy.

Sonymen birge, ákimdiktiń habarlaýynsha, agroónerkásiptik keshen men óńdeý ónerkásibi salasynda jyl sońyna deıin 11,9 mlrd teńgege 4 joba iske qosylyp, 150-ge jýyq jumys orny ashylady.

«PK Tsement zaýyty Semeı» JShS-de tik dıirmendi jáne tsement qaptamasynyń úshinshi jelisi, jartylaı et fabrıkattaryn óndirý zaýyty, «FIK Alel» AQ-da metallýrgııa zaýytynyń ýchaskesine arnalǵan kómir desorbtsııasy jáne elektrolız tsehy, «Zeıtenov» jeke kásipkerliginde súzbe tsehy iske qosylmaq.

Aıta keteıik, Abaı oblysy óziniń alǵashqy jylynda áleýmettik-ekonomıkalyq kórsetkishter boıynsha senimdi ósim kórsetip otyr.

Ondaǵy ortasha aılyq jalaqy 17,6%-ǵa ósip, 292,8 myń teńgeni qurady. Oblys bıýdjetiniń óz kiristeri 141%-ǵa ósip, qazynaǵa 87,4 mlrd teńge túsirdi.

Buǵan deıin Nurlan Uranhaev Aıagózde órt saldarynan tórt balasynan aıyrylǵan otbasyǵa qandaı kómek kórsetilgenin aıtqan edi.