Abaı oblysynda 15,3 myń adam jumyspen qamtylǵan
ASTANA. KAZINFORM — QR Eńbek jáne halyqty áleýmettik qorǵaý vıtse-mınıstri Asqar Bıahmetov Abaı oblysyna jasaǵan jumys sapary aıasynda óńir turǵyndarymen, qoǵam ókilderimen kezdesý ótkizip, iri ónerkásip kásiporyndarynyń jumysymen tanysty. Bul týraly QR Eńbek jáne halyqty áleýmettik qorǵaý mınıstrligi jazdy.
Kezdesý barysynda Asqar Bıahmetov memleket júrgizip otyrǵan áleýmettik saıasattyń negizgi baǵyttary týraly baıandady.
— Búgingi tańda memleket ózine alǵan barlyq áleýmettik mindettemelerdi tolyq kólemde oryndaıdy. Jyl basynan beri Abaı oblysynda túrli áleýmettik qoldaý sharalarymen 209 myńnan astam adam qamtylyp, 175,3 mlrd teńge kóleminde qarjy bólindi. Memleket basshysy atap ótkendeı, bizdiń basty mindetimiz — áleýmettik qoldaý júıesiniń tıimdiligin arttyryp, ony ádil jáne ataýly etý. Jumyskerlerdiń quqyqtaryn qorǵaýdy kúsheıtý maqsatynda Mınıstrlik birqatar zańnamalyq túzetýlerdi, onyń ishinde iri kásiporyndarda eńbek qaýipsizdigi boıynsha óndiristik keńester qurýdy mindetteý týraly bastamalar usyndy, — dep atap ótti vıtse-mınıstr.
Kezdesý barysynda jumyspen qamtýǵa járdemdesý sharalary da talqylandy. Atap aıtqanda, jyl basynan beri oblysta 15,3 myń adam jumyspen qamtylsa, sonyń ishinde 9,2 myńy turaqty jumys oryndaryna ornalastyrylǵan.
Munan keıin Asqar Bıahmetov óńirdegi iri ónerkásip kásiporyndary — «SemAZ» JShS jáne «Daewoo Bus Kazakhstan» JShS mashına jasaý zaýyttaryna bardy. Vıtse-mınıstr óndiristik jelilermen, avtobýstar, júk jáne arnaıy tehnıkalar qurastyrý tehnologııalyq úderisterimen tanysty. Bul kásiporyndar — otandyq avtokólik óndirisiniń flagmandary, júzdegen jergilikti turǵyndardy jumyspen qamtyp, óndiristi jergiliktendirý isine eleýli úles qosyp otyr.
Zaýyttardyń basshylyq quramymen jáne eńbek ujymdarymen kezdesý barysynda vıtse-mınıstr óndiristi odan ári damytý, sapaly jumys oryndaryn qurý, eńbek zańnamasynyń saqtalýy jáne eńbek qaýipsizdigin qamtamasyz etý máselelerin talqylady.
— Óńdeýshi ónerkásipti damytý jáne laıyqty eńbek jaǵdaılary bar turaqty jumys oryndaryn qurý — memlekettik saıasattyń negizgi basymdyqtarynyń biri. «SemAZ» syndy kásiporyndar óńir ekonomıkasyna eleýli úles qosyp qana qoımaı, óz qyzmetkerlerine áleýmettik jaýapkershilikpen qaraıdy. Mınıstrlik tarapynan kadr daıarlaý men óndiristegi qaýipsizdikti qamtamasyz etý máselelerinde jan-jaqty qoldaý kórsetýge daıynbyz, — dedi Asqar Bıahmetov.
Sapar aıasynda vıtse-mınıstr azamattardy jeke qabyldap, jergilikti buqaralyq aqparat quraldaryna arnalǵan brıfıngte júrgizilip jatqan áleýmettik saıasattyń negizgi aspektilerin túsindirdi.
Sapar qorytyndysy boıynsha Asqar Bıahmetov jergilikti atqarýshy organdarǵa jumyspen qamtýǵa járdemdesý jáne óńirde qaýipsiz eńbek jaǵdaılaryn qamtamasyz etý jumystaryn kúsheıtýge baǵyttalǵan birqatar usynystar berdi.
Aıta keteıik, Eńbek jáne halyqty áleýmettik qorǵaý mınıstrligi jańa jumys kestesine kóshti.