Abaı oblysynda 1,4 mlrd teńgeden astam bıýdjet qarajatynyń tıimsiz jumsalýyna jol berilmedi
SEMEI. KAZINFORM — Aıagóz aýdanynyń prokýratýrasy turǵyn úı-kommýnaldyq sharýashylyq, jolaýshylar kóligi, avtomobıl joldary jáne turǵyn úı ınspektsııasy bóliminiń bıýdjet qarjysyn tıimsiz paıdalanylýyna jol bermeý boıynsha shara qabyldady.
Tekserý nátıjesinde bıylǵy 30 mamyrda aýdandyq TKSh bólimi men «MIT Teploservıs» JShS arasynda «Ortalyq» qazandyǵyna kúrdeli jóndeý júrgizý týraly 1 mlrd teńgeden astam somaǵa shart jasalǵany anyqtaldy. Memlekettik satyp alý rásimi tótenshe jaǵdaıdyń saldaryn joıý degen syltaýmen bir kózden alý tásili arqyly júrgizilgen.
- Alaıda 2025 jyly Aıagóz aýdany aýmaǵynda qandaı da bir tótenshe jaǵdaı tirkelmegen. Bul bir kózden satyp alý tásilin qoldanýǵa zańdy negizdiń bolmaǵanyn kórsetedi.
Sonymen qatar, 2023 jylǵy 10 qarashada osy bólimmen dál osy nysanǵa jańa qazandyq ornatý týraly 110 mln teńgege úsh jyldyq kepildikpen shart jasalǵany belgili boldy. ıAǵnı, qazandyqty kúrdeli jóndeýdiń ózi de negizsiz bolyp shyqty, - delingen aqparatta.
Aýdan prokýratýrasy usynymynyń nátıjesinde zańsyz jasalǵan sharttyń kúshi joıyldy. Bólim basshysy Ákimshilik quqyq buzýshylyq týraly kodekstiń 207-baby boıynsha jaýapkershilikke tartylyp, 200 aılyq eseptik kórsetkish kóleminde aıyppul salyndy.
Prokýrorlyq qadaǵalaý sharalarynyń nátıjesinde 1,4 mlrd teńgeden astam bıýdjet qarajatynyń negizsiz jumsalýyna jol berilmedi.
Aıta keteıik, Abaı oblysynda 68 myń tonna qumdy zańsyz qazǵandar anyqtaldy.