Abaı oblysynda 13 jeńil jáne 25 júk kóligi jolda qalyp qoıǵan
ASTANA. KAZINFORM — Abaı oblysynda polıtsııa joldardyń jabylýyna baılanysty júrgizýshilerdi jylytý pýnktterine evakýatsııalady. Bul týraly oblystyq PD baspasóz qyzmeti málimdedi.
10 jeltoqsandaǵy qolaısyz aýa raıy Abaı oblysyndaǵy jol jaǵdaıyn qıyndatyp, birqatar avtojoldyń ýaqytsha jabylýyna sebep boldy. Óńir polıtseıleri jol qozǵalysyna qatysýshylardyń qaýipsizdigin qamtamasyz etý úshin kúsheıtilgen rejımde qyzmet atqardy.
— Jarma aýdanyndaǵy Qalbataý — Kókpekti trassasynyń ýchaskesinde 13 jeńil jáne 25 júk kóligi qalyp qalǵan. Kóktaıǵaq pen kórinýdiń shektelýi bul baǵyttaǵy qozǵalysty aıtarlyqtaı qıyndatty. Barlyq júrgizýshiler men jolaýshylar jylytý pýnktine evakýatsııalanyp, onda 24 adam ornalastyryldy. Olarǵa qajetti kómek kórsetildi, — delingen vedomstvo taratqan aqparatta.
Polıtsııa qyzmetkerleri júrgizýshilerden olardyń baǵytyn naqtylady, jabyq baǵyttar týraly eskertip, adamdardy qaýipsiz jerge jetkizýdi uıymdastyrdy.
Budan buryn Abaı oblysynda jol qaýipsizdigi kúsheıtilgenin jazǵanbyz.