Abaı oblysynda 1240 oryndyq 5 balabaqsha salynady
SEMEI. KAZINFORM – Abaı oblysynda 2027 jylǵa deıin 1240 oryndyq 5 balabaqsha boı kóteredi.
Oblys ákimdiginiń málimetine súıensek, óńirdiń áleýmettik-ekonomıkalyq damýynyń keshendi jospary sheńberinde 2023-2027 jyldary jalpy somasy 1,9 trln teńgege 9 negizgi baǵyttaǵy 102 is-sharany iske asyrý josparlanǵan.
«Jospardy oryndaý aıasynda 2023 jyly Berikqara ken ornynda ken óndirý jáne mys óńdeý zaýyty iske qosyldy. Besqaraǵaı aýdanynda 1 000 basqa arnalǵan bordaqylaý alańy salyndy. Sondaı-aq, Semeı qalasynda «Bala Park» oıyn-saýyq ortalyǵy ashyldy. Bıyl keshendi damý jospary aıasynda 391 jobany iske asyrý kózdelgen», - delingen aqparatta.
Bilim berý ınfraqurylymyn qoldaý qory esebinen Semeıdegi №4 jáne 30, Aıagóz qalasyndaǵy Boztaev atyndaǵy gımnazııa men №5, 6, 7 mektepterge 2 200 oryndyq qosalqy qurylys, Jarma aýdanynyń Keńtarlaý, Sýyqbulaq, Úrjar aýdanynyń Saǵat, Malaq, Aqsýat aýdanynyń Kóktúbek, Basqaraǵaı aýdanynyń Belokamenka aýyldarynda 510 oryndyq 6 shaǵyn jınaqty mektep salý josparlanýda. Qurylys jumystary 2025 jyly aıaqtalady dep kútilýde.
Memlekettik-jekeshelik áriptestik aıasynda 2027 jylǵa deıin 1240 oryndyq 5 balabaqsha salý josparda bar. Oblystyq bilim basqarmasy Qaraǵaıly yqsham aýdanyna 320 oryndyq 2 balabaqsha salý úshin jeke ınvestorlardy tartý jumystarymen aınalysýda.
«Jeke ınvestıtsııalar esebinen 14 sharany iske asyrý, onyń ishinde №3 JEO, 5 juldyzdy qonaq úı, Semeı qalasynda Muz aıdyny jáne «M.O.Áýezov atyndaǵy pedagogıkalyq kolledj» KMQK aýmaǵynda 300 oryndyq kontsert zalyn salý kózdelgen. Órt sóndirý deposyn, jelilik polıtsııa bóliminiń, tergeý ızolıatory ǵımaratyn salý jáne Beıbitshilik aralyndaǵy jaǵalaýdy nyǵaıtý boıynsha jobalaý-smetalyq qujattama da ázirlenýde», - delingen habarlamada.
Qurylys jáne jóndeý jumystarynyń merziminde oryndalýyn qamtamasyz etý úshin oblys ákimi tıisti basqarmalarǵa jumys barysyn qatań baqylaýdy jáne qarqynyn jedeldetýdi tapsyrdy.
