Abaı oblysynda 123 kólik ıesi qarsy betke shyǵyp, jol erejesin buzǵan

ASTANA. KAZINFORM — Abaı oblysynda Jedel basqarý ortalyǵynyń beınebaqylaý júıesi arqyly qarsy qozǵalys jolaǵyna shyǵýdyń aldyn alý boıynsha jumystar júrgizilip jatyr, dep habarlaıdy oblystyq PD baspasóz qyzmeti.

Vedomstvo taratqan aqparatqa sáıkes bıylǵy jyldyń basynan beri atalǵan baqylaý arqyly qarsy jolaqqa shyǵýdyń 123 jaǵdaıy anyqtalyp, joly kesildi. 

— Jol júrisiniń qarsy baǵytyna shyǵý — jol qozǵalysy erejelerin óreskel buzý bolyp sanalady jáne bul jol-kólik oqıǵalaryna ákep soǵýy múmkin. Abaı oblysynyń Polıtsııa departamenti qarsy jolaqqa shyǵýdyń saldaryn eskere otyryp, júrgizýshilermen turaqty túrde aldyn alý sharalaryn, reıdter men túsindirý jumystaryn júrgizip keledi. Oblys joldaryna ornatylǵan beınebaqylaý kameralary táýlik boıy jumys isteıdi. Bul júıe ereje buzýshylyqtardy azaıtýǵa, joldaǵy tártipti arttyrýǵa jáne barlyq jol qozǵalysyna qatysýshylardyń qaýipsizdigin qamtamasyz etýge kómektesedi, — dep túsindirdi departament.

Abaı oblysy Polıtsııa departamenti barlyq júrgizýshilerdi jol qozǵalysy erejelerin qatań saqtaýǵa jáne joldaǵy qaýipsizdikke muqııat bolýǵa shaqyrady.

— Esińizde bolsyn: qaýipsizdik — bul árqaısymyzdyń jaýapkershiligimiz jáne búkil qoǵamnyń ortaq isi. Qarsy jolaqqa shyǵý — aýyr saldarǵa alyp kelýi múmkin qaýipti quqyq buzýshylyq. Jolda biz tek ózimiz úshin emes, basqa júrgizýshiler men jolaýshylar úshin de jaýaptymyz. Erejelerdi saqtaý — bárimizdiń ómirimiz ben densaýlyǵymyzdy qorǵaýdyń kepili, — dep eskertti oblystyq PD.

Osyǵan deıin Abaı oblysynda kóshi-qon tártibin buzǵan 137 sheteldik elden shyǵarylǵany habarlandy.